Premier League : Manchester City ta ama ku chavei lâta nyungiapa ama chalo thei ha?

Manchester City chata Premier League liata champion haipa ama châna zie palâsa heihpa ta, zâhnia zâcho ta Manchester Derby, Old Trafford liata akhaihpa liata amâ iekhy zôzapa nata ama opapa, Manchester United cha rairuna muarua a tyh leipa ta 2-0 ta pahniepa ta, EPL Table liata amâ sâh chai ha heih. Nyungiapa cha ama chavei lâta ama kei vei ha, tah thei awpa duasu liata amâ kaw duah ha.

Champions League liata vâdua chhâna hmeiseihpa tah thei awpa ta Tottenham Hotspurs cha ‘Away goal’ ta pahnie leipa ta palôh pasa kawpa tat la ei ta; châhrasala he heta EPL nyungiapa chalo thei awpa duasu liata amâ duah, tahpa pamysa leipa ta, tlao ama tha ama pathyu via rili. Club chyhnawh viapazy châ mawh ei sala cha, Tottenham hmiakô liata ama vâduana khata thyu thei khao lei awpa ta a taola cheingei aw.

Atahmâ Season liata nyungiapa 4 chalo thei awpa duasu liata amâ duapa cha Champions League liata ama tla hapa vâta hnabeiseih awpa y khao leipa ta; anodeikua Old Trafford liata United 2-0 ta ama pahniepa vâta, Nyungiapa 3 deikua amâ hnabeiseih thei hai.

Pep Guardiola nata Manchester City heta EPL liata khaih 3 akhaih awpa ama kaw hneipa zydua liata pahniena ama to khai khiahta cha, NYUNGIAPA chalopa ta, EPL Champion ama châna ama pabohsa ha heih aw, tahna a châ.

Khaih 3 raihrie akhaih awpa liata Manchester City heta Point 89 hmôpa ta hmia a sah ei ta, Liverpool ta point 88 hmôpa ta ama pazi hai. Manchester City châta a piechhei awpa pathaih khao vei.