THE CRUSADE : Muslim zy ku tawhta Krizyhpa zy ta Jerusalem ama lapakhuana adyuhna

"THE CRUSADE " tahpa yzie a pahno leipa he eima hluh kaw thei aw, a chyusia kawpa ta chhopasia tua ei sihla : Jerusalem khu Zyhna py lai kawpa miano, Krizyhpazy nata Muslim zy ta ama su pathaihpa ta amâ pyh raihriepa châ ta. Krizyhpazy châta eima Beipa Zisu, Abei hawhta â ngiana khihpi nata Kraws liata eima châta ama khaipâna su a châ. Cha nota, Muslim zy châta chhao ama mopathaihpa, Muhammed-ta a vâ lâta a kiahna su a châ hra.

Google third party image

He khihpi lai tu leipa, thliepa ta a seihna lâ mile 1 chhao a tloh leipa â chhupa heta chyhsa thy khazie leichâma cha ama vaw thi ha. Peihria leipa machâ hawti a lai a chyhpazy taihta pahlôhpa châ vei ei. Rome a pao tawhna khata, kô 400 daihmâ chhôh cha Krizyhpazy ta avao ei ta. Châhrasala kô zabi 7-na â vaw pahieh papuapa chata, zyhna py thiehpa laipady kawpa, "ISLAM" avaw luah ta. Jerusalem chhao cha ama vaw la hapa a châ.

Jerusalem khihpi, Muslim-zy ku tawhta lapakhua awpa ta Krizyhpazy ta adyuhna ama siekheipa cha "THE CRUSADE" ama tahpa cha avaw châ hapa a châ.

ISLAM zyhna ry liata JERUSALEM cha kô 400 daihmâ kaw y heih ta. Châhrasala daihti vaw sie lymâ ta, JERUSALEM cha ngiapâleipazy ku liata a y ngâthlâh hapa a kholeipa vaw pôh via lymâ ei ta. EUROPE liata cha JERUSALEM lapakhua awpa khona ziza cha thlihpi hawhta a pathli lymâ ha heih hra. Pheisaih 60000 (thycharu) hleizy chata Khazohpa châta tahpa ta, Jerusalem lapakhua awpa ta ama hrona taihta i leipa ta chaihrai ama chaluah haw.

August 15, 1096 âvaw pahieh papuapa chata he pheisaihzy he Jerusalem khihpi pangaipa ta â chhi papua lymâ hapa a châ.

Jerusalem lapakhua heih awpa khona palôhruhpa he Krizyhpazy heta eikhapi ta ama phaoh tahna chhao châ muarua hlei leipa ta. A ziza cha pathli ngâthlâh ha tyh taraw ta, tao hmeiseihpa deikua ama vaw y beih leipa kha a châ.

Châhrasala he daihti rachhôh liata Catholic luhpa, POPE URBAN II chata he palôhrupa - "JERUSALEM cha KRIZYHPAZY ku liata a y awpa a châ" tahpa cha khâchâh a phaoh thlâh ha.

Ano he hmahlana siekheituhpa hryta a tôhpi chaipa tah ei sihla, eima reichhei chyh kaw aw. Achhâpa cha he hawhta pheisaih 60000 hlei apôhpakhy theina chhâpa he ano biereipa tawhta avaw thaopa la a châ ha.

He hleikhôta, he nona heta POPE châta daihti ryhpaoh kawpa â vaw pahieh papua laih heih hra.

BYZANTINE Beinarâh (atahmâ ta Turkey râh rachhôh khu) chata POPE baona avaw haw ta. He daihti nota BYZANTINE zy he KRIZYHPA pyly ama châ.

Châhrasala âmo he cha CATHOLIC châ leipa ta, GREEK ORTHODOX ama châ.

Atahmâhlâ reikah kawpa ta cha Protestant zy chhao tah ei sihla, amâ lyuna kao a za y thei hra aw.

BYZANTINE râh BEICHAIPA ALEXIOS I Komnenos chata, Muslim zy ta JERUSALEM khâchâ amâ vaopa cha a pachâdâh a châ lei kaw hra.

He hleikhôna heta Muslim zy ku liana heta a râh khazie leichâma vaw pahlei ha hra ta. He a râh pahlei hapazy lapakhua heih awpa a khohpa vâta nata, he ngiapâleipa, râh hluhpi la ta, hmah ama vaw sie lymâpa cha chatôh palie awpa a khohpa vâta POPE baona âvaw haw hapa a châ.

He hawhpa lâchhâhta a palôhrupa athata vaw hmâhtuhpa, POPE châta he hawhpa hleikhôta daihti ryhpaohpa he y khao thlyu aw vei.

Chatanachata, hmahlana awpa châta zawpi palôh pathyu thei chaina awpa reikah hneina chôta ziza cha a tao lymâ ha hra.

He hawhta a châ nona heta, he ziza pa-iatuh chaipa deikua cha November 27, 1095 liata FRANCE khih miakha, CLERMONT hawka liata bie a reipa vâta eima tah thei aw.

He liana heta Jerusalem cha Krizyhpa zy ku liata y awpa a châna zie zy, amâ ngiapâlâhpazy cha...ISLAM achhytuhpazy ta ama taolanazie zy cha thai kawpa ta reih lymâ ta.

He hleikhôna heta he adyuhna lâta a siepazy cha, "ama moleina pasipathaipa ta y aw ta...ama vaw thi hapa chhaota pachhapa ama châ aw" tahpa taihta a reipâ ngâkawpa hawhta Historian thokha ta ama palâsa.

Google third party image

 He daihti nota EUROPE rachhôh liata Awnanopa ta chyhsa palôh liata bie a rei theizie cha eima pahno chyu na ta pangiasa a chhih ta. POPE chaipa ta cha hawhta reikah a papua hapa cha zo lei thai’pa kha a za châ hra rai rai leipa kha a châ. Zyhna ama la pasa kawpa vâta KHAZOHPA châta adyuhna lâta sie awpa cha ahyrai ta ama byuh chaipa kha za châ leithei vei.

Cha hleikhôta, EUROPEAN chyhsazy heta he daihti nota JERUSALEM nata a chheipâh khihzy hneirôhzie he ama pahno khai thlâh ha hra. 

"The Battle of the Crescent and the Cross" cha a ia pathao haw

Rei ha chiehpa hawhta August ni 15, 1096 â vaw pahieh papuapa cha, lâhlâpi liata a ypa JERUSALEM lapakhua awpa chata pheisaih thy hluhpi cha amâ thao lymâ haw.

He pheisaihzy he khâpa hmahta pachâ chhielie leipa ta sie chakhyh tiarâh vei ei, âmo sahlao chhihtha awpa heta he daihti nota adyuhna dâh a thai kawpa nata Awnanopa chyhsa a ichapa GODFREY OF BOUILLON chhihthana ry liata ama sie.

Cha hawhta Khazohpa nata Awnanopa châta hrâsiepa ama châ ha tawhta cha, Krizyhpa zyhna liata a y leipazy maih cha "INFIDELS (Krizyhna a pyh leipa)" kha tlâ ama châ khai. A yzie chaipa cha Krizyhpa a châ leipa maih kha ama hmiahaopa kha tlâ ama châ khai.

JERUSALEM ama pangaina lâthlôh liana chata INFIDELS ama tahpa hawhpazy cha hluh kaw ei ta.

Hmophapa nata adopa a taopa hawhta â pachâpa ta JUDA zy nata mohropazy cha tapôh ama tlahnaopâ lymâ thlâh hapa kha a châ.

He pheisaih, Jerusalem pangaipa ta a siepazy he râh nano nanopa – FRANCE, GERMANY nata ITALY tawhta avaw hmaohpakhypazy châ ei ta, ama zydua ta ama awna cha FRANKS tahpa a châ. He pheisaih zydua chhihthatuhpa cha GODFREY tahpa eima palâsa ha khaw.

GODFREY he adyuhna dâh thai kawpa nata atu thai kawpa, Awnanopa chyhsa a icha kawpa kha châ ta.

He CRUSADE ama siena liana chhao heta thlah a chhâ nota ano vaw baokhâtuh awpa châta theihthaipa khaizie rakhama cha â chhi hrapa a châ.

Hleikhôna heta a hnoh heta a nawhta, ano hawhta adyuhna dâh a thaipa nata machhyu-mahrâhpa BALDWIN chhao a sie hra.

Baldwin deikua he cha zyhna kyh liata tlaitlao tu leipa, nôchhie kawpa a châ ei aw.

Châhrasala a uhta kiah liata khâpa pei hria ngâh leipa ta, pheisaih thlâhthlipa hawhta reingiah kawpa ta tlâ a zi hnolo hra.

Pheisaihzy a hâpakhyna su awpa ta BYZANTINE khihpi, CONSTANTINOPLE (Atahmâ ta Istanbul) cha a tlyh ei ta.

Pheisaih vaw tlô chhi lymâ ei ta, ama hry liana chata pheisaih riahphapa nata abei thisaih a pikheipa, BOHENOMA ama tahpa cha avaw tlô chho thlâh haw.

Ano he machhyu-mahrâhpa, adyuhna liata amâ pachypa châ ta, he CRUSADER zy âvaw pazao hlâta liana heta ITALY chho lâ râh zy a dyuh ta, a pahnie dyuta no a châ hra. He vâna heta pheisaih zydua hryta GODFREY zy unawh reipâpa ta chhao ano he â lâluah patlua kawpa rai a châ.

Byzantine beipa, ALEXIOS chata Islam zy adyuhpalie awpa ta cha pheisaih 300 hleita ngâlâh âvaw hnabeiseihpa kha châ ta.

Châhrasala POPE pachâdâh deikua châ vei tahpa cha rei angiah leipa hmo châ ta. Cha hawhta pheisaih 60000 hlei po amâ vaw pôhpakhy thlâh hapa cha a chipâ hapa a châ thlyu aw.

Achhâpa cha a khihpi chhao cha vaw khoh ha ei sala, eikhapi ta tlahnao ei ta a naosia kawpa ta a la thei awpa ama châ tahpa a pahno thlâh ha. So thai kawpa ta pheisaih 60000 hlei hryta hyutuh viapa pathôhpazy cha ano-eihta a daohpa ta, aryhna a taokhei ha ei hra.

Google third party image

Amâ ryhna liata cha, ALEXIOS ta Jerusalem ama ngaina lâthlôh zydua liata ama niebaw awpa nata a bu a sai awpa buakhei aw ta, châhrasala JERUSALEM ama pangaina lâthlôh liata khih ama lapa (BYZANTINE râh avaw châ tyhpa) zydua deikua Alexios ku liata ama pie pakhua khai ha heih awpa a châ.

Ama vaw siena EUROPE tawhta JERUSALEM tlô awpa heta Mile 3000 daihmâ sie a ngiahpa a châ.

He hawhta CONSTANTINOPLE tawhta ama sie heih n’awpa chhao he Mile sâh hlei a byuh thlâh ha chy.

CONSTANTINOPLE ama puasai tawhta hâta ei 2-3 rachhôhta liata ama siena chhâpa cha pasiapa ta a y ha bâ aw. Ama hmiakô liana chata ISLAM chyhsazy pahrâna – NICAEA ama tahpa cha â vaw duah thlâh ha bâ.

He khih he BYZANTINE eih châ tyh ta. Châhrasala kô 20 rachhôh a khô hapa liata SARACENS zy ta eikhapi vaw chho (Invade) ei ta, a vao ei ta...ama y pazaopâ lymâ hapa a châ. 

CRUSADER zy chata NICAEA cha ama chadô liahsa ha bâ. Châhrasala ama khih he ama vaw pabohsa pahnie ngaita kaw.

A khihpi pôhpalôhpa cha mile 3 dua ta pasihpa ku (fort) ta phie chadô khai ha ei ta, â sâhna lâ hra cha a chhie chaita metre 10 rachhôh sai châ ta (1 mtre = 3.3 ft approx), metre 30 likah lymâ liata Tower (riahvaihna) a y khai ha hra.

Rai naosiapa la châ tiarâh aw vei, châhrasala CRUSADER zy he ama thathyu tu thlâh ha ta. Achhâpa chhao he khih ama la awpa he ama rai athaona a châ awpa vâta a châ. Ama siena chhâpa, Muslim zy ama hmiachhyna hmiatua chaipa a châ awpa vâta chhao a châ thlyu aw, ngiarohna rai hnei vei ei.

Ama tlahnao haw, atha tlaita amâ dyuh tlai hra. CRUSADER sahlao he ama thathyu tu sao thlâh ha ta khihpi cha ama la h’awpa a châ ha bâ.

Aryhna liata ama vaw ro hapa hawhta, khihpi cha ALEXIOS hnohta pie pakhua awpa cha khâchâ amâ chhuah, châhrasala a khihpi chhôh liata hmo sôhpa, ama lapazy cha âmo tovyuh awpa hawhta khâchâ ama soh hra. 

Anodeikua, amâ hnabeiseih leipa hawhta hmo a tlô tlamaw haw! Cha hawhta Niceae khihpi pahniepa ta ama y ha aw, tahpa ALEXIOS ta avaw pahnopa cha a pachâ pha thei khao heih vei.

Ku hnôhkyh lâta a ypa, Askanian Tipo ama tahpa liana chata arulâ ta balyh athata pangiasa ta. Niceae avaotuhpa Kilij Arslan cha aryhna vaw taokheipa ta, June 18, 1097 zâcho chata Niceae khih chyhsazy nata ama hneina sôh zydua cha aru lâta avaw paly papua khai haw. Niceae cha tha thyu bohbi leipa ta a la ha tahna a châ.

A mylâ mydi ta Crusader-zy vaw thyu ei ta, Nicaea khihpi ama la hapa hawhta amâ pachâpa liata BYZANTINE flag âvaw tawhpa ama kei hmôpa cha ama sah kaw thlyu aw.

Hmo yzie cha thlai pahnothai ei ta, apaphasasaipa ama châ. Phuhla awpa chhao ama byuh ngaita kaw aw. Châhrasala BYZANTINE khih kei tlahnao ha ei sala, athata a pahlei aw ei ta, pheisaih hra cha â ta chhi thai awpa chi châ tlô vâ. Tlâ siesai awpa cha ama bietluna a châ ha bâ.

Chatanachata JERUSALEM pangaipa chata sie lymâ ha heih ei ta. Ama pahno rai rai leipa cha ama pahnie hapa khih beipa khata phuhla a chhuahpa ta aru lâta avaw pazi lymâ ei, tahpa cha a châ.

CRUSADER zy hra chata pahno tiarâh tlôh ei vâ. Pheisaih sahlao a pazipa ama châpa vâta a hnôhlâ a ypa, Bohemon chhihthana ry liata pheisaih 20000 rachhôh â soh ei ta. Âmo heta hnôh ama vaw khaw lymâ. Châhrasala ama vâ ma dua ha ma...ama hmialâ ta a siepazy nah chata ama likah cha â hlie ngaita kaw. Zâ daihti avaw tlô na ta chhochhi cha a eihhrâhpa ta Riebu ama tao awpa â ngiah haw. Cha tlai cha âmo vaw pazituhpa Khilij Arslan chata khâ avaw hâ thlâh hapa cha a châ.

A pheisaih hneichhôhpa zydua nahta thapi phia hmeiseihpa ta, Crusader a hnôh lâta a ypazy cha eikhapi ta a za tlahnao haw. Âmo hrata cha hawhpa âvaw hnabeiseih pha tiarâh tlô ei vâ. Daihti vâro tlai amâ dyuh tawhta Crusader-nah palie cha ama duasu a chhie via haw.

Châhrasala ama hryta chyhsa thokha a râpapua thei chhopa ta ama hmialâta a ypa pheisaihzy lâna chata zikyu amâ kei râ hmâ haw. A daihti ta liata ama vaw tlô hmâ ha hra.

Chatanachata Khilij nata a pheisaihzy cha amâ chatôh palie thei haw. Zikyu awpa kha a râpapua thei vei mawh sala cha, phie amâ mua khai thlâh ha thei. Cha hawhta pahniena ama to heihpa chata CRUSADER zy cha sasyh â ngâna pahneisa via heih ta. Ama hryta pakha chhochhi ta cha O lâta a chhôhkhazy hnohta châ a paphaopa liata, "Atahmâ tawhta hâta ei thôhna liata cha JERUSALEM eima la ha bâ aw" a kaw tah ngâkaw thlyu aw.

Amâ piechheina pahnopa ta, lâthlôh tyhpa chhao zi ngâh khao leipa a chahlôna zie ta sie lymâ ha ei ta. Amâ chhuahna hawhta sie thei ha ei mawh sala cha a patoh viapa ta JERUSALEM ama tlô thei awpa châ ta...amâ sohsi tuna liata athata ama chahlô ha tahna a châ.

Cha hawhta daihti vâro chhôh ama sie tawhta ANTI-TAURAS Tlâh ama tahpa cha tapôh kiah heih ei ta. He liana heta lâthlôh liata chyhsa hluhpi amâ pahlei heih hra.

A thipa hry liana heta BALDWIN lahpinô chhao a hlao hra ta. He hmo tlôpa heta amâ lâthlôh a chhih haipa liata yzie a pathuh kawpa a hneipâ ha heihpa a châ.

BALDWIN lahpinô he chyhsa hneirôh kawpa chhôhkha tawhta laiseihpa châ ta. He hawhta avaw thi tawhta cha a hneirôhna a hneipazy chhao cha a thi raohpa chata pabupa a châpâ ha hra tahpa cha Baldwin chata my vei. Cha hawhta avaw châ ha tawhta cha a palôh phaohzie cha phie â nano ha. Achhâpa cha atahmâ cha a lahpinô hneirôhna liata a pahnieh thei khao vei.

Ano khota hneina sôh â pahaohpalyu bâ awpa â ngiah ha bâ ta; cha chata khohleikhonazy nata âdoleipa ta hmotao khohna avaw sapapua hapa a châ.

Atahmâta âchhuah chaipa cha, he CRUSADE he â thôh kawpa ta hmâh phahnai ta, kheihawhpa râh liata tlyma râh hnei awpa cha â chhuahpa a châ haw.

Chatanachata pheisaih chyhta a chhipa ta ano-eihta a sie haw. Ama sie pasih hlâta ama hmiakô liata khihpi a ypa cha ama kei hmôpâ ha hra. He khihpi he Edessa châ ta. Khihpi ativy kawpa nata hneirôh kawpa ama châ hra.

Châhrasala BALDWIN châta apielyuna awpa rai parusa kaw tyhpa cha, a chhôh liata khihpi avaotuhpazy nata a chyhsazy taihna chata Krizyhpa a icha kawpa ama châpa cha a châ.

Châhrasala Islam zy ta ama vaw chho (Invade/raid) ngâthlâh hapa vâta cha hawhta pheisaih ama vaw hmôpa cha amâ vaw pachyhparyh kaw.

Châhrasala cha hawhta Krizyhpa pasaipha nata pheisaih riahpha sahlao ama châ tahpa ama vaw pahno patawnah ta, eichhia leipa ta thlai avaw ly ei ta, ama bei ta chhochhi cha ama hnohta khihsapâ ha awpa ta avaw hruapâ ngâkaw ei.

Ama siesai heih awpa ama chi tu hapa vâta ma a châ ma, BALDWIN cha Edessa khih beipa chata a saw hawhta â la ta, a thi tawhta â bei awpa ta a raopâ ha hra. Châhrasala Baldwin cha kheihawhpa chyhsa tlaima a châ tahpa a pahnopasia leina chata ano thlâ khaoh awpa â chhiah ngâhai tahpa rai pahnosa vei. BALDWIN chhao cha daihti buakha chhôh cha abei sawchapaw hawhna chata y hra ta.

Châhrasala ama bei cha ama khona dâh hawhta a thi patoh khao leipa ma a châ ha mâ. Thie awpa ta ama teiparu haw. Cha hawhta teiparuna a y tahpa a pahnopa vâna chata ama bei chhao cha â râ haw ta, châhrasala ku liata zôrih hmâpa ta a zâ pangieh ngâ nona chata li ta ama kasao hapa a châ. BALDWIN chata a khopa cha a hnei haw.

CHRONICLER (Thâtih parohpa rohtuhpa) pakha chata "JERUSALEM kha ISLAM chyhsa zy avaw vao leipa ta...EASTERN CHRISTIAN zy ta avaw vao hapa chhao châ ei sala, reipasipasuana ama hnei pyly aw. Pamosana ta nâmo he CHRISTIAN dopa châ vei ei chi, tahpa ta ama tlahnao pyly aw. Achhâpa cha ama mokhaoh liata lai chaipa cha a râh hneirôhna deita kha a châ" a tahpâ ngâkawpa a châ. He heta zyhna hropa zituhpazy ta CRUSADE miah ama hmôpana dâh/vaw pachâna dâh a pasia kaw thlyu aw.

CRUSADER hmiakô liata khihpi sâkha avaw luah heihpa cha ANTIOKEI khihpi cha a châ ha heih.

He khihpi he CRUSADER zy châta cha lymâ rônah kaw awpa hawhta â pachâ thei ta. JERUSALEM tah leipa liata cha ama lâthlôh liata khihpi ama chapiapa peimawh chaipa a châ.

Antiokei khihpi he ama la tlai khiahta cha, JERUSALEM ama tlahnao tita ama rai awpa 30% ama patlô ha tahna a châ aw. Achhâpa cha he khihpi heta niebaw, chaihrai nata amâ ngiahpa hropa zydua pie thei aw ta, hnôh amâ sypa chhaota amâ chhaina awpa sup ha kawpa a châ thei awpa vâta a châ.

TURK nahzy ta ryurei hra ei sala, Antiokei khihpi liata a pahrâpa hluh viapazy he ARMENIAN nata GREEK ORTHODOX CHRISTIAN zy ama châ.

Ama bei he sia kaw ta...ISLAM zyhna zituhpa châ hrasala, KRIZYHPAZY nata MUSLIM zyhna zituhpazy cha mo panano leipa ta, khotalai kawpa ta ama zyhna zi chyu awpa ta a pasai ei.

Châhrasala cha chata CRUSADER zy cha a pakhâ na ta pangiasa a chhih vei. Achhâpa cha ama khihpi hneirônah cha kyh kha vaw châ ha sala, khihpi avaotuhpazy cha TURK chyhsa, ISLAM zyhna zituhpa la ama châ ha.

Antiokei ku he ngâ a chhih kaw ta. Ama bei chhao cha machhyu-mahrâhpa, adyuhna dâh a thai kawpa châ ta. Adyuhna dâh a thai awpazie cha rei a ngiah leipa ta Antiokei khihpi a la theina dâh tawhna chata a sia thlâh ha.

Abei moh he Yaghi-Siyan châ ta. Cha hawhta Crusader zy ta ama khihpi ama vaw chadôpa cha ryraona taopâ lymâ ha ta. Châhrasala a palôh liata lai chaipa deikua cha, a khihpi chhôh liata pahrâpa Krizyhpazy chata Crusader zy cha ama vaw bao khoh thlâh ha vâ ma, tahpa cha a châ.

Châhrasala ryh rao lymâ ta, bietluna tao chhao a parusa lei kaw. ISLAM zyhna azituhpa zydua cha ku khôtho ta liata khaoh (Trench) chao awpa ta phie a tuah papua khai ha ei.

A mylâ chata Krizyhpa zydua cha khaoh chao awpa a tuah papua heih hra ei. Krizyhpazy ta ama chao nona heta cha Ku Ochhipipa cha phie a khaw syulyu ha.

He hawhta a tao leipa ta a châ khiahta cha ama palôhphaozie pahno tlô leipa ta, he vâna heta he hawhna heta a tao hapa a châ.

Abei so kawpa nata asohsi kawpa hmahta châ hrasala, rairuna chyhnawh kawpa ta a pabua ha hra. A chihupa hawhna tlai chata Crusader-zy cha khihpi chhôh lâ tawhta baotuhpa vaw y ha ei ta. Thla 8 chhôh tlai ku ama chadô tawhna chata hlaotlohna ama to ha hra. A chhôh liata a pahrâpa zydua cha phie ama thie khai thlâh ha cha maw!

Châhrasala, Hlaotlohna topa ta, khihpi peimawh kawpa ama la thei tarawpa ta, alyna daihti dâhdei chhao hnei hmâ vei ei.

Achhâpa cha khihpi ama chadô thaota nota Antiokei beipa ta baona su hropa lâta â kei hawpa kha a hlao vaw tloh ta. Crusader zy ta pahniena ama to noh mylâ liana chata Turkish pheisaih hluhpi ama vaw tlô haw.

Ku latuhpa, Crusader-zy cha chadôpa ama châ ha heih hra. Chariah hluh kaw ei ta, âmo Crusader zy hra cha adyuh khai dyuta, ama riethei sahlao kaw ta. Ama palôh chhao pua a dua khai hmâ ha. A tao n’awpa ama pahno khao vei tawhta thlahchhâ paraohna hnei awpa ama pahrua haw.

He liana heta baona, hmo no-âhchhihpa, zo a chhih lei daihmâpa, Crusader zy khitlyna thâtih rona liata a roh tlôpa hmo a vaw tlô ha bao.

Cha hawhta thlah ama chhâ khai tawhta daihti chhao a sie liahsa ha bâ, tahpa liana chata Theihthaipa thiehlâ kaw chypa (Junior kaw chypa) pakha ta aluahna a hmô tahpa cha athata pathâh ta. Chyhsato cha hmo-yzie pahno a chhuahpa ta kalihpi ama to thlâh ha. Theihthaipa ta aluahna a hmôpa liata cha, "Vâlyuhchâpa pakha he ahnohta avaw luah ta, he khihpi liata chapel (Achhyna-O chyhpa) sâkha liana heta Zisu ama khaipâ nota, a kâ liata ama chhôna seichhi kha y ta. Cha cha lapapua la, pahniena a cha tokhei aw" tahpa cha a châ.

Thina nata hrona likah liata ama y nota aluahna ama hmôpa cha kyh kha lâta chyhsa hluhpi ama zo lei thei hra, ama zo thei hra. Châhrasala Theihthaipa biereipa cha hlaopatloh amâ chhuah haw.

Chyhsa amâ cha-iechahmy tu leina awpa ta aluahna hmôtuhpa Theihthaipa nata atlyhpa-eihpa chyhsa 20-30 rachhôh cha aluahna liata vâlyuhchâpa ta a reipa seichhi cha ama tlua haw...khôtho lâ tawhta ama hmô thei lei awpa ta seichhi yna ama chao no heta o chhi amâ khawhlô khai ha.

He aluahna hmôtuhpa he rei hapa hawhna khata Theihthaipa Junior kaw chypa châ ta, a moh cha Peter Bartholomew a châ. Thlah ama chhâ paraoh nona khata hmo no-âhchhihpa patlôsa awpa thlahchhâ ta, aluahna hmôpa hawhta â reipa chhao cha zo lei theipa châ leipa ta...aluahna a hmôna dâh a reipa hra cha pasiapanôpâ theipa a châ pâ lao heih.

Cha hawhta aluahna a hmôpa hawhta Ochhi a khawhlô khaipa ta ama chao hnolopa cha daihti ama hmâh reipâ hapa vâna chata khôtho lâta vaw hâtuhpazy cha ama hnabei chhao a dy pathao ha. "Khâpa hmahta châ vei hih” ama tah pathao ha.

Châhrasala cha hawhta thachhie kawpa ta ama y nona chata Chapel Ochhi cha eikhapi ta avaw pahy ta. Zawpi mokhaoh chata chapel ochhi avaw pahypa cha a tawpâ thlâh ha hra. Amâ hnabeiseih kaw tlôhpa, ama zo-âh tlô leipa cha avaw tlô haw. Theihthaipa Bartholomew chata seichhi sâkha...sai-ie kaw bâpa...a patuna ngaih, tho ta ama taopa y phathi khao leipa cha avaw chaluah haw. Ama hyutuhpa pano, Baldwin nata Bohemon zy chata cha seichhi cha ZISU kâ liata ama chhôna seichhi tlai kha a châpa ta khâchâ a pyh ei ta, cha cha zawpi pachâdâh chhao khachâ rakhama cha a chhihtha hrapa a châ.

Atahmâ cha ama hiana chyh-eihpa ta y ha ta, Khazohpa ta a ypâ ei tahpa cha khâchâ amâ pyh ha hra. Thatlôna thiehpa hneipa ta, ama yna ku chadôtuhpa TURKISH pheisaihzy adyuh awpa ta amâ chhuahnoh lymâ ha heih. He liana chhao heta hmo no-âhchhihpa avaw tlô ha heih. He chhao he Crusader hry liatapa pakha ta avaw ropa chhao a y heih hra. Ku tawhna chata puapa ta, adyuh awpa ta amâ mâ haw. Pheisaih ama thi hluh kaw bâpa vâta ama sie tua no hawhna khata la châ khao vei ei.

Cha hawhta Crusader zy ta adyuh awpa ta ama ku ama puasai paki tawhta nata amâ paryh hai nona chata, Turkish pheisaihzy cha amâ râpaih khai haw. A pachâna rai pahno vei ei. Châhrasala ama hnôhkyh lâ tawhta pyury paropa ta, kalihpi ama vaw toh tawhta cha, Crusader zy chhao chata ama hnôhlâ cha a kei heih ei ta. Ama hmo hmôpa chata ama no a pa-âh ngaita kaw. Ama hnôhkyh liana chata pheisaih hluh chaimâhpa...a râhpa ta a tobipa, arâ râhpa chô liata a kiahpa hluh chaimâh cha amâ vaw hôh chheih thlâh haw. Cha chipa chata Turkish pheisaihzy cha amâ râpai khai hapa he vaw châ ta. He hmo tlôpa heta a eichhiana athata tao ta. "Hand written account" zy a ypa vâta zo a chhih vei tah thaipa châ leipa ta, châhrasala Historian hluhpi ta deikua zo vei ei. Anodeikua adyuhna liata â hlaopa ta avaw ropa a y thlâh hapa vâta zo lei awpa za châ thei tlô vâ. A eichhiana deikua a papua hluh kaw.

Khih hneirôhpa Edessa nata Antiokei ama lapa vâna chata ama chhihtuhpa pano Baldwin nata Bohemon-zy chata hneirôna ama pachâ tuna liata, Jerusalem lapakhua awpa rai pachâ phathi thei khai vei ei.

Châhrasala pheisaih hluh viapa palôh liana chata ama siena chhâ chaipa Jerusalem khihpi, Islam zyhna zituhpazy ku tawhta la awpa cha lei vei.

He hawhta ama chhihtuh chaipa hawhta rei thei awpa pano – Baldwin nata Bohemon zy palôh anoleipa lâta â heih hapa cha kheita ma ama siena chhâpa lâta ama paheihsa heih thei awht, tahpa ta pachâna hmâh ei ta, hmahla amâ chhuah haw. Anodeikua he liata ama hmotaopa deikua he cha Crusade chhôhta hmo ama taopa liata rarô-y chaipa nata pasichhih chaipa eima tah thei aw.

Antiokei tawhta â hla tu leipa liata khih miakha, Maarrat al-Nu'man ama tahpa cha y ta. Cha khih chyhnawh kawpa chô liana chata ama chhihtuhpazy chôta ama palôhtlâhleina cha tlao ama kei palâsa haw. A zo ta eikhapi ta va chho ei ta..he khih liata chyhsa a pahrâpa, Krizyhpa nata Muslim pathlua leipa ta phie ama kei thie khai ha. Cha dei cha â daih tah leipa ta, ama ri cha chhohpa ta ama niepâ lao heih. Amâ pielyuna dâh he rarô-y kaw hrasala, amâ chhuah chaipa deikua a hlaotloh kaw. Ama chhihtuhpazy chata he hmo a tlôpa vâna heta...ama siena chhâ chaipa JERUSALEM la awpa chata ama palôh ama tao ha heih. Chatawhta cha JERUSALEM la awpa ta amâ chhuahnoh haw.

Ama sie tawhta kô 3 daihmâ a khô tawhta, mile 3000 hlei ama sie tawhna chata AD 1099, June tha liana chata Crusader pheisaih 13000, a y bâpazy cha Jerusalem ku Chhikao cha ama kei tlô haw. He liata Jerusalem kei tlô theipazy he EUROPE tawhta ama vaw siepa pheisaih su palih pachhaih ta, su kha dâhdei chhao tloh phathi khao vei ei. Lâthlôh liata athata amâ pahleipa chhao a châ thei. Cha hawhta Jerusalem khihpi ama kei tlôpa cha...pahniepa cha rei lei...âdyuh chhao amâ dyuh hlâta thokhazy chata aleilô cha sy ei ta, thokha hra athata vaw cha ei ta. Châhrasala, ama hmiakô liana chata amâ chhuah chaipa, ama siena chhâ chaipa chata a hâ thlâh ha ei, tahpa deikua my vei ei.

Ama chhihthatuhpazy cha khihpi chadôtuhpa ku zy cha achupasia tua ei ta. Jerusalem ku cha avaw pi ngaita kaw. Â sâhna lâ cha Ft 50 châ ta, â chhana lâ hra cha Ft 10-po a châ. Jerusalem khihpi cha cha ku pha chaimâhpa chata phie a chadô papua khai ha. He ku kiahpapua awpa heta chhaichhi athata amâ ngiah awpa hleikhôta, tho chhao amâ ngiah hluh kaw aw, tahpa cha ama pahnopâ ha. Châhrasala Jerusalem avotuhpa Muslim zy chata Jerusalem khihpi kiah nata chheipâh liata tho a ypa cha phie ama vaw thlu khaipâ lao heih. He he Jerusalem vaw tlahnaotuhpazy ta chhaichhi taona awpa tho ama hnei leina awpa ta ama tahpa a châ. Ama tao pasu kaw.

Atahmâ cha Crusader zy châta cha pachâna pasoh kawpa hmâpa ta ryrao â ngiah ha bâ. Hleidy nata Ku lana châta phahnai awpa ahluahtheipa (Siege Tower) zy tao awpa a ngiah ta; châhrasala a taona awpa tho hra y tlô vâ.

Châhrasala he tluta a hlapa vaw sie ha ei ta, cha hawhpa vâta kuasai awpa palôh rai rai phaoh vei ei. Ama hyutuhpazy chata pheisaihnah cha a phu phu ta sohpa ta..khatluta a hlapa hmahta châ hrasala, tho ama hmôpa maih thlu ta, lapakhy awpa ta ama tah haw.

He liana chhao heta hmo no-âhchhihpa avaw tlô ha heih. Crusader zy chô liana heta Khazohpa hmotao no-âhchhihpa ei hluhpi avaw lâ ha ta. Atahmâ chhao âvaw lâ ha heih tah theipa a châ.

Maw lâta tho tlua awpa ta a siepa zy chata tlâh miakha cha kiah tua ta, tlâh haosâ lâta tho a y nata y lei moh awpa a chhuah ei ta. Cha hawhta tlâh kaw kiahpa ta, a laki liata amâ kaw pahâ nona chata, ama hry liata pakha chata ama yna rachhôh liata aleilô cha a nai kawpa heta pahno ta. A phei chata alei cha za thiahthâ ta, lei ama chao khai dyupa, ama nai thiehpa a châ tahpa ama pahno haw. No-âh â chhih kawpa ta ama pahnopa vâna chata alei cha ama chao haw. Alei cha a chao chhao nao kaw ta. Alei ama za chao lymâpa cha, ama pangiasa pha leipa hmo ama za hmô haw. Tho tai chiehpa sai, tlai 400 tlai âvaw paryh thlâh haw.

Chatanachata ama tho hmôpa hmâpa chata chhaichhi zy cha ama tao lymâ haw. Hleidy vâro tlai nata Ft 50 ta a sâhoa Siege Tower sâno taona awpa âvaw khi thlâh haw. Crusader zy a lyna dâh awpa he pahno pha thei hra vei sihla, ama thathyu aw ta, thatlôna thiehpa ama hnei cheingei aw. 

Atahmâ cha hmoto a châna awpa hawhta ama paryh liahsa haw. Jerusalem tlahnao awpa ta amâ mâ liahsa ha bâ. Hyutuhpazy chata ry ama raopâ lymâ ha hra. Py no lâta a pachhaih ei ta, py khata Maw-nochhi (Northeast) lâ tawhta tlahnao aw ei ta...py kha ta Chho-nochhi (South East) lâ tawhta ama tlahnao hra aw. Chatanachata, 14 July 1099 zâ chata tlahnao awpa ta amâ thao haw. Muslim zy chata Siege Tower sâkha deita chhao cha hmahta ama ku avaw tlô khiahta cha pahniepa ama châ thei, tahpa ama pahno thlâh ha hra.

Vâduachhih kawpa ta Crusader zy châta chhaichhi peimawh kawpa, Siege Tower, chho lâta ama sopa cha Muslim-zy ta li, meiti nata sathaw sapa ama pataihpazy chata a pakâ haw. Crusader zy châta hnabeidy â chhih daihmâ thei aw. Maw lâta ama sopa Siege Tower deita cha amâ pahniehna a châ ha bâ. Chho lâta hmo tlôpa ama pahno na ta, ama hyutuh chaipa Godfrey chata amâ chhuahna hmiatuapa phiepa ta, hmahlana dâh thiehpa hmâ awpa â chhuah haw. Amâ dyuh hlâta Jerusalem ku amâ chupasia nona khata bâhta tlâh byuhpâpa liata ku ama pahniehna thabypa kha hmô ei ta.

Châhrasala tlahnao a rairu kaw awpa vâta cha su cha su peimawhpa (strategic point) châta a pha na ta chhao ama pangiasa leipa kha châ ta. Châhrasala cha su cha Muslim nah zy chhao chata a sie a rairu kawpa vâta, cha tawhna chata ahy hmahta ama tlahnao na ta ama pangiasa leipa a châ ngyu aw, vaihtuhpa chhao â soh vei ei, tahpa cha ama pahno thei haw. Cha su tawhna tlai chata tlahnao awpa amâ chhuah haw. Chatawhta cha, cha su, tlâhbyuhpa, lâthlôh siena awpa chhao y phathi leipa liana chata ama chhaichhi, ‘siege tower’ cha ama pasiesa haw. A rai chhao a ru kaw tlai hra. Thapi phiapa ta nata achhuahna hmeiseihpa ta a pielyupa ama châpa vâna chata Siege Tower cha ama khona su liana chata ama kei patyuh thei haw. Vaihtuhpa chhao vaw y tlai leipa ei ta, liahsa amâ paryh tawhta, ama kiahpâ lymâ ha hra.

Jerusalem khihpi chhôh amâ vaw ngia thei, tahpa ama pahno patawnah chata Muslim pheisaihzy chata Godfrey nata a pheisaihzy yna lâ cha avaw ngaipâ lymâ ei ta, athata amâ tlahnao hra. Godfrey chata ama Siege Tower cha mei ta a kaw kâ pathao, tahpa a hmô patawnah ta ano tlai cha a zaw pathlahpa ta, mei ta rao a chhuahtuhpazy cha a za thie khai ha ei. Chatawhta cha, ku chhôh a ngiapa Crusader thokha ta Jerusalem angiana Ochhipipa ama pahy hapa vâta khôtholâ ta Crusader zy cha amâ zâ ngia lymâ haw.

Muslim nah cha a râpai chaimâh ei ta. Jerusalem cha ama parua thlâh ha bâ. Heta pachâpa ta cha Muslim-nah kha hluh via awpa ta pachâpa châ ei ta; Crusader-nah kha 13000 hlei deita tlâ ama châ bâ. Châhrasala, Muslim-nah khata ama chipa vâta ma a châ ma, Jerusalem khihpi cha June noh 14, 1099 zâcho avaw tlô na ta cha, KRIZYHPA, Crusader zy ku liata a y hapa a châ.


(Translated into Mara by Robert B.Syuhlo, Admin, MlT)