Ei pasâhsapa - By Damary P.Hlychho

Africa râh Ghana liâta tloh lei kawna chôta ei vaw chakao rakha tawhta, kyhpachâna nata khokheina zy thata dao na ta, chahleikhôta thlahchhâ khâ na bao tuhpazy hnei lymâ heih na ta, khizaw liata hneirôna zydua hnei vei hr'aw sala, he tluta byhnâ sôhpa he, he khizaw liata ei to thei khao vâ ma tahpa zy athata eina pachâsa.

Ei chyhsa pasâhsapa zy, ei hmokhopa zy nata ei palôh ta a pasôpa zy, pitloh ei tah kawpa chyhsa zy chhao âma vaw nano via lymâ... Dyhchhie/hneirô, Hâra/nôhmei,  Movyh /Mongyu, Hmipha/hmichhie, châthaipa/châthai leipa etc, pahruâ hlei leipa ta bao ângiâhpa mâih a bao lymâtuhpazy, reikah deita châ leipa ta hmotaopa ta palâsa tyh tuhpa zy he ei pasâhsa kaw cha maw. He hawhpa chyhsa zy he Abeipa bie ama paki kawpa ta ei pahno ❤.( Zami 1:26 "Ei unawh sâih u, eima Beipa Zisu krista rônahna Beipa cha ngiapâna chôta, chyhsa thleipa hlei hnei kha u".)

Chahleikhô ta eima chhie chai no nata eima pha châi nota chyhsa chakuhchavei thâi kawpa chyhsa zy he pitloh ei tah kawpa chyhsa ama châ hra.

Eima yna râh Ghana he krizyh  leipa ama hluh kaw chyhpa hnaihta, thokha/thono a pha âh leipa y tyh hra eisala, ama vaih nata tlâh, opa-lyuhrizy nata chhôhha sanawhzy ama chakuh chavei thaina he ei pasâhsa kaw. Keimo Marapa râh, Abeipa pho âtlyhpa, Awnanopa hluhpi yna liâ chhao he hawhta vaih na tlâh kyh apachâpa chyhsa ama y holô na ta eipangiâsa hra. (Ei palôh liata avaw lâi kaw hnâihta,  ei thai leina chôta ei vaw roh hra hih😊).