Kô 2019 Lok Sabha MP atlohpa hryta hawti chaipa Tribal chanô

Chandrani Murmu, tribal chanô, Keonjhar, Odisha tawhta Lok Sabha MP a tlohpa cha Member of Parliament (MP) a tlohpa hryta hawti chaipa châpa ta, kô 25 nata thla 11 ta uhtheipa châpa ta atlyh patlohpa a châ.

He tribal chanô Murmu he, engineering graduate châpa ta, MP a tloh hlâta cha B.Tech degree hneipa chanô, mohropa hawhta rai a tlua haipa hawhpa deita a châ hra. Châhrasala, a châta vâhneina eima tah ma noh vaw chhipa ta, Tikargumura khih, Keonjhar district liata Naveen Patnaik chhihthapa Party Biju Janata Dal (BJD) MP Candidate châta raopa tlao a châ haw.

Atahmâ ta atlyhna liana khata Murmu heta ei no tlai he bia tawhta MP avaw tloh hapa, BJP MP Ananta Nayak cha Vote 67,822 po ta Keonjhar Lok Sabha bia liana heta pahnie ta. Murmu chata, "Engineering degree ei patlô tawhta rai tluapa ta daihti hmâh pazao lymâ na ta. Politics a ngiahnaopa ta MP taihta ei tloh aw, tahpa rai pangiasa beih va na. BJD Ticket ei to aw tahpa chhao he a hnabeiseih beih leipa na ta, pangiasaleina lâ tawhta tlao ei vaw to ha" tahpa MP a tloh tawhta biereina a hneipa liata a reih papua.

Murmu heta NS Police high school, Keonjhar nata Bhubaneswar tawhta High School patlô ta. B.Tech degree he OA University tawhta a patlô hra. Chandrani Murmu heta Keonjhar Lok Sabha bia liana heta Vote thysy 5 (lakhs) hlei tlai a hmô.

Chandrani paw, Sanjiv Murmu, he sawhkhâ raihriapa châ ta, a nô Urbashi Soren he O chhôhkhaohkha nôhrâpa a châ.

Lok Sabha atlyhna châta a Campaign nona heta â kholâhpa Party hropazy ta Video sâkha cha pananopa ta, ano mohpachhie achhuahpa ta athata tlahnao ei ta; anodeikua biedopa avaw luahpa ta, ano châta chhiena hlâta phana a vaw tlôkhei hapa a châ.

- India Today