Siaha liata 'Road Safety Week' pahy; Driver pha chaipa atlyhna hneipa a châ

Siaha, May 27: Atamy dawh 7:00Am khata Traffic Point, Siaha Bazar-liata '30th Road Safety Week' pahyna daihti a hmâpa châ ta. He daihti he Pihnô B.Malsawmtluangi, DTO ta chhihthapa ta, Puhpa R.Lalremsanga Addl.DC chata khichhailaipa chãpa ta he '30th Road Safety Week' he a pahy.

Khichhailaipa Puhpa Marema chata biereina hneipa ta, Ahluahtheipa apiepasina hluh viapa he a khaw â supia leipa vâta châ leipa ta, a kohkituhpa chyhsapazy eimâ sohsi tyh leipa vâta tlao a châ via tyh. Ahluahtheipa apiepasina khôkhâh awpa heta Driver, passenger nata zawpi zydua ta hmahlapa ta, Traffic rules zy a pha kawpa ta zyhpa ta, tao awpa nata tao lei awpa Rules ta miah chhopa he a pha kawpa ta tao chyu a chhuah ei suh u, tahpa ta zawpi he daihti avaw hlaopazy a hrua ei.

Puhpa David Thansei tawhta Traffic Rules chôchâh liata pahno awpazy nahthliepa châ ta. Pihnô Kimi, Staff Nurse, District Hospital apiepasina avaw tlôna daihti liata First Aid pie n'awpa dãh pamosana a hnei hra.

Puhpa Lalrinliana Pachuau MVI, Siaha chhaota DTO enforcement wing zy raihria nata Driver nata zawpizy pahno awpa reina a hnei hra.

Atamy ta '30th Road Safety Week programme' liana heta Category 4-liata Best Driver atlyhpapuapazy hnohta Ryuchâ nata Phusâ Rs.1000/- sai hlãpa ama châ hra.

BEST DRIVER ZY :

1) Taxi-ah liata - L. David Thanga S/o L.Lunghnema

2) Maxi Cab-liata - TBC.Lallawmzuala S/o Lalrinawma

3) Govt Driver-liata - Ngunchunga S/o Thanhlira, Police Deptt

4) Auto Rickshaw liata - Solomon
S/o C.Dawkho zy ama chã.

He daihti avaw hlaopazy ta Traffic Rules zyh awpa ta bietaina (pledge), Puhpa VK.Hlychho, Enforcement staff, DTO office sahlaota ama hnei hra.

Programme khai tawhna heta Pledge Signature Board-liata zawpizy ta Traffic Rules eima zyh pha aw tahpa ta, signature ama pie.