Manchester City FC hneituhpazy ta ISL Club Mumbai City FC chalei aw?

English Premier League champions ​Manchester City ​chata Football khizaw liata ama râh pakawh via lymâ awpa ta, ​India râh lâ a vaw heihpa ta, Indian Super League club ​Mumbai City FC chalei awpa ta hmah ama la pathao hmeiseih ha bâ.

Manchester City FC biehneituhpa sahlao, City Football Group (CFG) Executive-zy heta ama theina rakha ta Indian Super League club a daoh pazao lymâpa ta, he amâ daohna sie lymâpa hawhta a châ khiahta cha, Mumbai City FC heta hneituhpa thiehpa a hnei ha bâ awpa a lyu kaw bâ.

Man City Chief Executive Ferran Soriano chata atakô kôthaona lâchhâh liana khata CFG ta India râh liata Football club hnei awpa amâ chhuah tahpa vaw reih ha ta, ama club a daohpa hry liata Mumbai City amâ hlao hra, a vaw tah hapa kha a châ.

Man City Chief Executive heta, “Adaohna eima siekhei haipa vâta daothei kawpa ta eima hâ awpa a ngiah ta. Kô 2 chhôh tlai India râh Football liata ahniahni awpa heta daihti eima vaw hmâh ha bâ. Atakô cha India liana heta eima hmahlana eima siekhei ngiathia ha bâ aw.”, a tah hra.

CFG heta ama club laipa, Premier League champions Manchester City, hleikhôta USA liata New York City FC, Australia liata Melbourne City, Uruguay Club Atletico Torque, Uruguay nata Chinese club Sichuan Jiuniu-zy chhao chalei ha ei ta. Spanish club Girona nata Japanese club Yokohama F Marinos liata chhao tovyuh (Share) ama hnei hra.