Samaw Marasaw

Siaha liata Petrol pha leipa ama patu

Siaha, May 31 :  Atanoh nochhôh liana khata J.Rama Filling Station, Siaha liata unload awpa Petrol 12000 litres, Tanker AS - 01GC/7483 ta a phaopa cha Legal Metrology Siaha zy ta ama tao tyhpa hawhta check ei ta, a quality nata quantity-liata a tloh leipa vâta ama patu.


He Petrol he târi 25.5.2019 khata Challan No. 18743620 hmâpa ta Silchar Depot tawhta phaoh papuapa châ ta, Driver he Pradip  Chasa, Rammanipur, Assam châpa ta motor hneituhpa he Rama Filling Station, Siaha a châ. Driver heta Challan liata density â print chiehpa cha correction ta panano ta, cha hawhna chata Oil he a vaw pahleipahlôpa a châ.

Oil vaw tlôpa he a hluh / tlohna zie awpa chhao tloh hra vei. Oil la papuana tawhta density nata unload na awpa density hmô papuapa â pathliena he 003.0 a khô awpa a châ lei nota Tanker compartment to liata density â pathliena zie he hihsâpa ta 005.9 salyu a châpa vâta unload tlâh châ leipa ta, The Legal Metrology Act 2009 under Section 30 nata The Motor Spirit (MS) hawhpa High Speed Diesel (Regulation of supply, Distribution and Prevention of Malpractices)  Order 2005 hmâpa ta hriena pie awpa a châ. Tank Lorry nata Driver he Police Station, Siaha ku liata hlâpa châ ei ta. Legal Metrology Siaha zy heta Oil nata Gas vaw tlôpa maih he zawpi lâta raih papuapa a châ hlâta mohpasia tua tyh lymâ ei ta, Underground Oil nata Pump Delivery chhao a châh viachhie ta surprise checking ama hnei tyh hra.

Târi 2.4.2019 zâ liana khata Deputy Commissioner hmahlana ta surprise checking hnei ha ei ta, quality nata quantity liata a phapa ta ama hmô. Atahmâhlâ liana heta LAD Dept MADC zy chhaota hriaparaopa ta  Sa Bu tlohpa ngâlâh ama chalei thei nawpa ta hmah ama la hai hra.

No comments