Kô 2018 chhôhta Mizoram liata chanô hlâta chapaw ama thi hluh via

Siaha, 1 Khihpa 2019 : Kô 2018 chhôh khata Mizoram liata hawti a pihpa 20984 ypa ta; he hawhta a châ nona heta chyhsa 5525 ama thi hra. Hawti a pihpa hryta chapaw hluh via ei ta, a thipa hry liata chhao chapaw ama hluh via hra.

Economics & Statistics department-ta atliata a papuapa, ‘Annual report of registration of births & deaths Mizoram 2018’ ta a palâsana dâhta zâkô chhôhta hawti a pihpa hryta chapaw hluh viapa ta, chapaw 10685 pih ei ta, chanô 10299 ama pih hra.

Ama palâsa lymâ liana ta zâkô 2018 chhôh khata chyhsa a thipa 5525 y ei ta, he hryta 3502 cha chapaw châ ei ta, athipa hryta 2023 cha chanô ama châ. Zâkô chhôh pyly khata hawtipa athipa 304 nata hawsaihpa a thi chiehpa ta a pihpa (still birth) 40 ama ypa ta ngiapa a châ hra.

Dawhtyzy ta thohna-O liata a thipa chyhsa 3280-zy thina chhâpa, ‘Medical Certification of Causes of Death (MCCD)’ ama palâsana dâhta a thipa hluh chaipazy cha chhôhlâ pochhina/chhôhlâ pha leina vâta a thipa hluh chai ei ta, henahzy he sahma, pathi pha leipa, pavyh pasapa nata pavyh pha leipazy châpa ta, thina zydua tawhta reipatipa ta chhôh lâ pasana vâta a thipazie he 19.5% ama tloh.

Palâsapa a châna dâhta, ‘circulatory system’ cha thina tlôkheituhpa 2-na châpa ta, cha zy cha thisaih sâhpa, châh-ao pha leipa nata a hropazy châpa ta, he he a pôhpalôhpa tawhta reipatipa ta 15.9% tloh ta, sâthôhna cha pasana hri vâta thina châpa ta - HIV, septicemia nata malaria zy châ ta, henahzy vâta thina he 15.2% a tloh hra.