LADC liata Congress sawhkhâna a sie pazao lymâ chy aw - T.Zakunga, CEM, LADC

Lawngtlai : Lai Autonomous District Council-liata Chief Executive Member T.Zakunga chata a chhihtha haipa Congress sawhkhâ chata LADC-liata ryureina siekhei pazao lymâ awpa ta member a pazai thlâh ha chy tahpa Governor hnohta a pahnosa tahpa reihpa ta, LADC sawhkhâ cha chipho sawhkhâ a châpa vâta â icha kawpa ta a duah sala tahpa cha ano nata a hrialâhpazy khona a châ tahpa ta, LADC-liata Congress sawhkhâ cha pao thlâh ha awpa ta reina a ypa chôchâh liata zawpi cha ama thlahzoh lei awpa ta bie a ta.

T.Zakunga (File picture)

CEM T.Zakunga heta ‘press chyhsazy hnohta a chhihtha haipa sawhkhâ tawhta Congress MDC papalih nata Independent MDC pakha zy ta a sawhkhâ tawhta pua ha hra ei sala, elected MDC 12 a hnei hleikhôta Nominated Member 3 chhaota manôh 15 a hneipa vâta member 28 yna LADC-liata Congress chata member a hnei hluh via chy tahpa reihpa ta, Nominated Member-zy ta sawhkhâ khopathliahna liata vote ama hnei thei leipa hawhta reipa cha biechaopopa a châ CEM chata tahpa ta, LADC Constitution Conduct of Business Rules-liata Nominated Member zy ta Vote ama hnei theina nata hnei thei lei kyh â rohpa y vei, a ta. 

Kô 2007-khata Mara Autonomous District Council liata Gauhati High Court-ta Nominated Member zy ta Vote hnei thei aw vei tahpa bietluna tao ta, châhrasala kô 2013-liata Gauhati High Court pyly ta he bietluna a y chiehpa he dythapa ta Karbi Anglong sawhkhâ liata Nominated Member-zy ta vote ama hnei thei aw tahpa ta bietluna tao ta, Supreme Court bietluna chhao pahno awpa a y tahpa ta, he vâna heta LADC liata, a chhihtha haipa sawhkhâ thlaita pao thlâh ha bâ ha awpa hawhta reina cha biechaopopa a châ, a ta.

Congress Legislature Party puasaituhpa MDC 5 zy cha ahaona hnei vei, tahpa ta, T.Zakunga chata, LADC dâh a duah haipa ama paraopa vâta, Member ama châna pahluhpa awpa ta Governor hnohta Pohbienoh khata a tlôkhei tahpa reihpa ta, Governor bietluna a mokhâh hai tahpa ta, Gauhati High Court-liata a chatlie thei chaina hawhta tlôkhei awpa â chhuah tahpa a reipâ hra.

LADC-liana heta elected member 25 nata nominated member 3 y ei ta, T.Zakunga chhihthapa Congress Legislature party tawhta atlia khata Congress MDC 4 nata Independent MDC 1 zy puapa ta, MDC 8 a hneipa MNF nahta United Legislature Party padua ei ta. Congress cha member hnei chyh viapa hawhta reihpa ta, Governor hnohta sawhkhâna pataosa awpa ta ahaw awpa amâ chhuahpa kha a châ.