Article : Marapa DNA cha Apôhkhana - By Vahnei Mathipi

Miah pathlatuhpazy ta, “ AWH A PAI CHY TA AMÂ PACHU” tahpa bie ryu sôhpa miah sopa ei ta;

He bie ryu sôhpa hro lymâ ta, Marapa ta apôhkha lei awpa chi pi ta, apôhkhana he eima hro ta pasô ta, eimâ pôhkha lymâ. Chin chiphozy hry ta Marapa he â pôhkha chaipa chipho eima châ cheingei aw. Miah pathlatuhpazy ta awh tawhta amâ vaw chupa bieso hih, rônah ta, a thu ta, â sâh hmeiseih. Ama vaw so hmeiseih. Filawsawfâ rônahpa ama tloh.

Awsicharunô hawh Reih pachiahpa miah charu-  Tlôsaih-Siaha, Chapi-Ngephe, Zyhno- Lialai- Heimâ, Lôchei- Hawthai, Lautu, Vytu, zy a kaopa ta Mara Reih nata Mara phopi padua pi;

Krista chakaona kyh phahnai ngiana vâta Awnanopa py nanopazy ta eima y nanopa chhao ta, Akaona, chakaona, raihria zy lia apôhkha ta ku cha-ao ngiathia pi;

Khokheina dâh â lyu leipa vâta pawliti lia pâti nanopazy ta y nano tyh hr’ei sih la, khih nah râh paduana, chipho paduana kyh zydua liata a pathlie cheita leipa ta a patu khâchâ ha tyh pi;

India, Myanmar, USA, Australia, Europe, Malaysia, Singapore tahpa zy liata eima pahrâ nanopa chhao ta, kyhpachâna lyubiehzy avâ ziza lia a paphao pi ta, chhie noh, pha noh, aly noh nah ngiaroh noh, khih nah râh, chipho paduana kyh zydua liata bâliah cha-ao ta chhiekhoh phakhoh tyh pi;

KEI LA MARAPA DNA CHA APÔHKHANA HE A CHÂ, EI TAH.

He Marapa DNA he-

Kôzabi 17na rachhôh ta vaw papi ei ta, laiseih laihpa khizaw râh sawkhâ ryureina nata biehneinazy;

Marapa atlâhkhana (equality) hmiahaopa bei, machhie, pho, dyhchhie, hneirôh, chanô-chapaw pathluanazy;

Paritheipa ta a patu hapa (addict) hawhta biehnei khona, Marapa moh ta sôh tluana, sasyh moh pathâh khohna, chhôhkha niedo tluanazy ta patu ha hra sala;

Marapa dychhiena, hneirôna, hmotaotheina zy ta,

Mara DNA parao thei beih khao aw vei.

MARA DNA CHA APÔHKHANA CHÂ TLÔH TA.