Assam : Pachyhnoh liata India chyhsa nata râh hropa chyhsa pahruana NRC Final List tawhpapua bâ aw

NDTV : Mylâ târi 31, Thlazoh 2019, Pachyhnoh my dawh 10:00Am-pa khita, Assam state chhôh liata a pahrâpazy, Assam/India chyhsa ma ama châ ma, Râh hropa chyhsa (Foreigner)-ma ama châ ma tahpa pahruana châta taopa, National Register of Citizens (NRC) Final List cha papuapa a châ ha bâ aw. Kô kha chhôh tlai ama vaw buakhei hapa, Assam NRC liana heta chyhsa thysy 41 (lakh) cha Assam ti nata râh chyhsa châ vei ei, tahpa ta pahlaopa châ leipa ei ta. Pachyhnoh ta he NRC liata a hlao leipa chyhsa thysy 41 (Lakh)-zy chhichâna he pasiapanôpa a châ hmeiseh ha bâ aw.

India sawhkhâ chata, he NRC Final List liata a hlao leipazy cha, India chyhsa châ vei ei, tah thlâh ha awpa châ leipa ei ta, Dâh hawhta liahsa India chyhsa ama châ zie pasiapa a châ khai tawhta ama chhichâna awpa ta a sia aw, a ta. Ahyrai NRC liata a hlao leipa maihta cha ‘Foreigners Tribunal’ liata tlôkhei thei aw ei ta, he ama chôchâh tlôkhei theina daihti chhao he noh 60 tawhta noh 120 lâta pasihsapa a châ ha hra.

Home Ministry chata he NRC liata a hlao leipazy ta ama chôchâh ama tlôkheina awpa su (tribunals) 1,000 pahypa a châ, tah ta; atahmâ duasu liata he hawhpa he 100 pahy hapa châ ta; Thlarâh thlâpâ liata 200 pachy chhipa a châ heih aw, ama ta. He liata ama tlôkhei tawhta chhaota NRC liata amâ hlao heih leipa ta a châ khiahta cha, High Court nata Supreme Court taihta ama ngai thei hra aw, tahpa ta Sawhkhâ biepuapa chata a palâsa.

He NRC Final List ama papua awpa vâna heta Bangladesh nahta arâhripa, Assam liata cha ahrohruana siekhei haipa châ ta, buana a tlô thei n’awpa su hawhta pachâpa zy liata cha chyhsa papalih hlâta hluh viapa ahmaohsiah pasai leipa châ ta, he liana heta Guwahati chhao â hlao hra. Centre sawhkhâ chata Assam liana heta pheisaih 20,000 a tua chhi ha hra.

He hawhta a châ nona heta, BJP chhihthatuhpa thokhazy chata NRC liata Bengali Hindu vâro tlai pahlaopa ama châ leipa vâta ama pachâ peimawh kaw, tahpa reih ei ta. Assam Chief Minister Sarbananda Sonowal, chata Home Minister Amit Shah nahta hâta hmiatuapa liata amâ hmô khai tawhta, Centre sawhkhâ chata NRC liata râh hropa chyhsa ama vaw pahlao tlamawpazy pazaw theina dâh tao awpa a chhuahna ama hnei hai, a ta.

Biehnawhta a palâsana dâhta, BJP chhihthatuhpazy cha Hindu chyhsa vâro tlai pahlao leipa ama châ aw, tahpa chi kaw ei ta. Reipatina liata cha Assam liata Bengali Hindu 18%-zy cha BJP Vote tuhpa ama châpa hawhta reipa a châ. 18 per cent Bengali Hindu vote bank supports the BJP. Zâkô ta atlyhna liana khata BJP heta Assam liata MP seat 14 liata Seat 9 la ei ta – he he tribal chyhsazy, Assamese Hindu nata Bengali Hindu-zy apôhkhana vâta a châpa vâta pahnopa a châ.

National Register of Citizens (NRC), kô 1951 liata Assam liata papua tuachaipa kha Supreme Court biepiepa hawhta pathiehpahlâh ngâthlâh hapa châ ta, he he Pamih 25, 1971 khai tawhta Bangladesh tawhta India avaw ngiapazy pahrua achhuahna châta hmahlana a châ.