Dawhty hnohta ei Hiahrihna

Hiahrihna : Chanô kô 16-ta uhtheipa châ na ta, ei pôhpa liana heta hmi he hluh kaw ta, ei viasanah hry liata ei no a za tyhpa vâta ei hmi he ngyu tyh na ta, hmichâpa vaw thao ha ta, ei nôpo tu ha ta, ahy hmahta chho ngâh tlô leipa na ta, hmi pathlana thohna he a y ma?

Achhyna : Chanô châta cha hmi pazaipa/hnei hluhpa he byhnâ riethei a chhih kawpa a châ thei aw. Chapaw châta chhao hmi hnei hluh tu hapa he cha no-ai lâta tlao a chhih ta, internet liana heta he hawhpa lâchhâh he eima hmô châh a y tyh. Kheitarai châ sala, khâpa vâta hmi pazaipa ma na châ? Tahpa nata mohôh theipa chi a châ ma tahpa he pachâkhei awpa nâ ngiah tahna a châ. Na palôhrupa rie chhao a thei kaw tahpa â lâ ta, viasa apakyhna kyh liata chhao akarina/athlachhiena na hnei cheingei aw, palôhrupa lâ taihta chhao Depression taihta a cha tlôkhei thei na ta pangiasa â chhih. Ahmiatua chaita na pahno ngâthlâh ha awpa ta ei khopa cha nâma hawhpa he chyhsa hluhpi ama y hra tahpa he a châ.

Hmi pazaipa/hnei hluhpa he achhâpa nano nanopa a y thei aw, achhâpa eima pahnoleipazy he tlao a hluh viapa châ ta. Chhôhkha a pathla pachhuahna châ khoh kaw ta, he hawhpa he a châ khiahta cha tao n’awpa muarua y leipa ta, thohna a pachao muarua awpa chhao y leipa ta, â ngiahnazie lymâ hawhta hmi ngyupa kha tao theipa a y chhôhpa cha tlâ a châ chy. Hmingyuna hmâ awpa â vaw ngiah hapa a châpa chhaota company phapa taopa chhâ he hmâh awpa a châ. A hropa heihpa liata cha chanô châna lâchhâh liata a supia leipa, reproductive hormones buana vâta a ypa a châ thei heih hra. He hawhpa liana heta pasana chi kha, Polycystic Ovarian Disease (PCOD) he achhâpa alâluah kawpa châ ta. Chibyh liata a pasiapanô leipa hmo hluhpi a ypa vâta chapaw hormones athata a tao ta, chanô hormones nahta â khothai-balance leipa vâta hmi athata a vaw papua tyh. He pasana pahno awpa heta cha Ultrasound hmâpa ta mopa chhao a ngiah thei aw ta. Thohna hmâpa ta mohôh theipa a châ.

A hropa liata cha Hirsutism tlâ ama tahpa, chapaw hormones chanô liata athata â vaw taopa y thei ta, he he a paru via chhochhi khiahta cha chanô châna (Chanô hmo) kha chapaw châna (Chapaw hmo) hawhta a vaw y thei. Cushing’s Syndrome ama tahpa y heih ta, eima pôhpa liata gland miakha, Adrenal Gland sianô leipa vâta a y theipa châ ta. Steroid lâchhâh a nie hluhpa zy he ama hnei khoh kaw.

Khâpa rai châ sala, achhâpa pahnopasia awpa ta cha dawhty a pamosa ha tua la. Chanô dawhty nata Medicine Specialist asaohiah awpa â ngiah thei aw.

A mohôhna kyh liata cha hmi ngyupa he a peina muarua y leipa ta, hmi paraipa deikua he cha pha tu âh vei. Hmi kaw pua/pyuh awpa chatliesa (stimulate) thei ta, chavâta hmi phiapa he cha tao lei awpa a pha. Skin treatment pie theipazy chhao a y heih hra, Skin Doctor zy a saohiah la, ama cha vaw bao thei aw.

Thohna niepa lâchhâh liata cha a boh chai leipa ta; tawhta, thohna ama pachao tyhpazy he side effect pha leipazy a hnei tyhpa vâta thohna he cha a pachao thei leipa aw pi ta, he châna heta Medicine Specialist zy avaw pamosa ha tua la a pha thlyu na.

(He hiahrihna he Dawhty athaipazy ta ama chhyna, Website hropa tawhta lapa a cha.Admin)