Dawhty hnohta ei hiahrihna

Hiahrihna : Kô 30-ta uhtheipa châ na ta, daihti khachâ rakha tawhna khata Luh pasapa he hnei tyh na ta. Zawpi apôhpakhyna liata a hlaopazy, ziza a thla tyhpazy liata nata (stress) viana daihti liana heta ei luhpasapa he a vaw pua pachaih tyh. Tawhta, khôtho puana daihti liata noh a vaw palopâ ha na ta ei mo he thloh tyh ta, ei luh he a pasa kaw tyh hra. A vaw pasana châhki heta pasapachhana nie tyh na ta. Thohna nie ngâthlâh hapa heta peina a hnei ma? Eina bao thei khiah chita la ei châ ly kaw aw.

Achhyna : Luhpasapa he a chhâpa hluh thei kaw ta, pasana chi nano nanopa â vaw lâpapuana dâh (symptom) châ ta. Kô nata khih reizie ta zy, chanô nata chapaw liatazy â nano thei hra, chanô ma na châ ma chapaw ma tahpa vaw reih tlôh leipa chi ta; chavâta a chhâpa nata a vâpa châ thei sala a ngiapa eima rei tua aw.

Luh pasapa he a chhâpa a y khiahta cha mo lâchhâh phaleipa he a châ via chai tyh. Chavâta luhpasapa hnei tyhpa châta cha mo pamosa (check)-pa he eima pachao tuachai tyh. Mo (check)-pa chhao heta ‘refraction test’ â ngiah cheingei hra. Mobaina a bai tyhpazy liata cha mo thatlôna (power) â vaw nanona daihti liana heta luhpasapa tlôkhei khoh kaw ta. Mo hmâh hluh (stress)-pa, computer hria hluhpa, mobile phone mo hluhpa zy heta luh pasapa areipasipasuana hluh tyh ta, luhpasapa a tlôkhei tyh. Mo thatlôna (Power) ananona a y ngâthlâh ha khiahta cha ‘blood sugar fluctuate’-pa vâta a châ khoh kaw, zôthlôh hneipa ama châ khiahta pakhâta ta a mohôhpa a pha.

A hropa liata cha BP a sâhpa vâna heta luhpasapa a y khoh kaw. BP sâhpa kohki (Control) leipa tlyma, kohki (control) pha leipazy ta cha luhpasapa he ama rei hohpâ kaw. A hropa liata luhpasapa hleikhôta luhpahiahpa he ama reipâ tyh hra. Chanô liata cha thi ama hnei lichih, sianô leina vâta tlyma ama luh pasa tyh ta. Thyroid lâchhâhta rairuna, a pachaihpa ta ‘Hyperthyroidism’ hneipazy heta luhpasapa ama reih hoh kaw hra. Stress hnei hluhpazy, zâ a mô pha leipazy nata TV moh hluhpazy heta luhpasapa ama hnei khoh kaw.

Migraine – luhpasapa ama tahpa deikua he cha â nano ha heih. A hnei lâlao hapazy ta cha daihti bitaipa hawhna heta a pasana daihti tyhpa liata vaw pasa tyh ta, â vaw thaona dâh awpazy he thokha liata cha pahno chhielie theina zy y ta, a châhta mocharawpa ta ypa ta, awhsi a zawpazy hmôpa hawhta y ei ta, roh pahrona hropazy chhao a y thei hra. A chhâ chaipa pahnopa châ leipa ta, a vaw pua lâlao ha khiahta cha pasapachhana thohna thatlô kawpa hmâpa ta kohki (control) a byuh ngâthlâh ha tyh; avaihna thohna zy a y tarawpa ta tlô/yzie hnei tu vei.

Luhpasana chhâpa pahno tua awpa he peimawh kaw ta. Chavâta, blood sugar, BP, mo checkup â ngiah aw. Lathli lâchhâh sianô leipa ‘rule out’ a ngiah ta, cha châna chata CT Scan tlyma, MRI Scan tlyma chhao tao â ngiah aw. Luh pasapa vâta pasapachhana nie ngâthlâh ha awpa â ngiah khiahta cha pavyhpi vaihpâ awpa a ngiah ta, pavyhpi acid hluh tu awpa vaihna châta PPI thohna – Pantoprazole, Omeprazole lâchhâh biepâ theipa châ sala. Peimawhpa cha a chakhiehcharieh kawpa ta dawhty â vaw pamosa cheingei ma y.

(He hiahrihna nata achhyna he Dawhtyzy ta amâ chhyna, Website hropa liata lapa a châ. Admin)