Harry Maguire : Khizaw liata Defender mâ ru chaipa Manchester United ta ama lapangia haw

Manchester United chata England centre-back Harry Maguire cha Leicester City tawhta Defender mâ ru chaipa châ awpa ta £80m – ta ama lapangia haw.

Kô 26-ta uhtheipa Defender heta kô 6 chhôh Old Trafford liata châh awpa ta biehraina roh ta, he he ano khotlyna ta pasihsa via thei awpa ta taopa a châ hra.

Man United ta Maguire ama lapangiana zie heta kô 2018 liata Liverpool ta Southampton tawhta £75m ta ama lapangiapa Virgil van Dijk a chhao ha tahna a châ.

Maguire chata, "Manchester United tan a O chhi ama vaw chakhyh khiahta cha, ryhpaohna pha chaimâhpa nâ tyh tahna a châ” tahpa ta United liata â ngiapa cha â lyzie a palâsa.

Maguire he English Top Flight Football liata Player mâ ru chaipa panona châ ta. Pakhana cha United liata akhaihpa pyly, Paul Pogba (£89m) châ ta. He hleikhôna heta Maguire he Gareth Bale ta £85m ta kô 2013 liata Real Madrid â pazao tawhta British Player hryta mâ ru chaipa panona a châ, tahna a châ ha hra.

Maguire he United manager Ole Gunnar Solskjaer ta atahmâ nopi pasiena daihti liata Player 2 - right-back Aaron Wan-Bissaka, Crystal Palace tawhta £50m ta, winger Daniel James, Swansea tawhta £15m ta a lapangia tawhta Player pathôhna a châ.

Maguire chata “Manager nahta eimâ pakyhna tawhta, Club châta a hmiasai nata achhuahnazy a rônah tahna ta, ei tha eina papawh kaw. United Boss heta nyungiapa chalo awpa ta achhuahna hnei hmeiseih ta. Club liata ei khaihlâh awpazy nahta daihti hmâhkhoh awpa a ngiahtiah khao va na" a ta.

Solskjaer chhaota Maguire he reithaipa ta, "Harry he atahmâhlâ khizaw liata cha Centre-back pha chaipa pakha châ ta. Akhaihna dâh thlai patu thaipa nata tlyliah liata â ichapa, cha-iechahmyna ry liata chhao bua leipa a châ” a ta.

Player pasie theina daihti noh 3 ngâlâh y bâ ta. He hawhta a châ nona heta Premier League club-zy ta Player lapangiana châta sôh ama hmâpa zydua cha £1bn a tloh ha bâ heih.

£2.5m tawhta Defender mâ ru chaipa

United heta Maguire he khahlâ tawhta lapangia a chhuahpa ta avaw chadaipazi ha ei ta; thla 12 a khô hapa liana khata lapangia awpa a chhuahpa ta ama vaw teina kha, a mâ châta ama hawpa £70m kha a hluh tu ha tahpa ta amâ vaw sysai hapa kha a châ.

Zâkô Thlarâh thlâpâ liata Leicester châta kô 5 chhôh châta biehraina a rohpa, Maguire heta, kô 2017 liata Hull City tawhta Leicester â pazao tawhna khata Premier League liata ei 69 â khaih hmâ.

Maguire heta kô 2014 khata Sheffield United liata Professional Football akhaih pathao ta, Sheffield United châna heta ei 139 akhaih hmâ ta, kô 2014 khata Hull City â pazao hapa a châ.

Maguire heta England châta kô 2017 Thlazoh tawhna khata akhaih pathao ta, FIFA World Cup 2018 Russia liata England ta Semi Finals ama tlô theina lâthlôh liata peimawh chaipa pakha a châ.

United liana heta Centre-back 6 - Eric Bailly, Phil Jones, Victor Lindelof, Marcos Rojo, Chris Smalling nata Axel Tuanzebe y chhielie ei ta, Maguire heta duasu phapa a to lymâ thei ma?