IAS rai tawhta bâna pangiatuhpa ta Jammu & Kashmir zawpi duasu ta a palôh a hria tahpa a rei

Kerela chyhsa, Indian Administrative Service (IAS) tawhta zâhnia tliata liata bâna pangiatuhpa, Kannan Gopinathan chata, IAS Officer rai a bâsaina chhâpa cha khâpa hropa vâta châ leipa ta, “Khotalai kawpa ta ei pachâna palâhâh awpa ei khohpa vâta a châ” a ta. Gopinathan heta, Jammu & Kashmir zawpi chô liata India sawhkhâ ta kohkina a chaluah haipa chôchâh liata a pachâna chhao khotalai kawpa ta a phuahluah ngâh leipa chata IAS Officer tawhta bâh awpa ta a tuah raruah hapa a châ, a ta.

Kannan Gopinathan chata, “He râh he Yemen châ vei, kô 1970 rachhôh kha châ hra vei, zawpi adona tovyuh zydua chhupa ta, ahy hmahta khâpa hmahta reih ngâh hra vei ei” tahpa ta The Wire thâtihbu a chho. “Atahmâ he kohkina a icha kawpa ry liata Noh 20 chhôh tlai cha Jammu & Kashmir zawpizy cha hraikhôhpa ama châ ha bâ. He hmo chôchâh liana heta reikah leipa ta a tyuh thei khao va na..IAS Officer rai bâsai awpa â ngiah hapa chhaota atahmâ ei bâsai ha tlai hih” a tah hra.

Kannan Gopinathan heta, atakô Nawh thlâpâ liata IAS Officer châna bâsai hatuhpa, IAS Topper, Shah Faesal patupa a châpa chata a nah charao pachaih ta. Shah Faesal he Jammu & Kashmir chyhsa, IAS Topper a châ theipa châ ta. A State J&K Politics ziza saipa ta tao awpa a hnei hrapa ta â pahnopa vâta IAS Officer rai bâsaipa ta Politics lâ a ngia hapa kha a châ. India sawhkhâ ta Jammu & Kashmir chôchâh liata bietluna chyhsa pahlaw kawpa a tao khai tawhna khata, Shah Faesal heta Kashmir lâ sie a chhuah ta, anodeikua Srinagar Airport liata ama vaw patu hapa a châ.

Kannan Gopinathan heta atliata tawhna khata Civil Service rai he vaw ai pathao kaw bâ ta; he he khâpa hropa vâta châ, khâpa hmo ma a do ta, khâpa ma a do vei tahpa pachâna chhao y hmâ leipa ta Politician-nah zy tuapahaipahipa ta ypa cha a ai kaw bâ hrapa a châ. Jammu & Kashmir chôchâh liata sawhkhâ hmahlana khata a palôhru chaipa liata tao awpa a khopa cha tao leithei lei awpa ta a tuah raruah hapa a châ.

Kannan Gopinathan heta, “Thâtihbu hnei hapa la châ h’aw sala, mylâ ta ei thâtihbu biepipa (Headline) awpa cha ‘20’ tahpa a châ cheingei aw. A chhâpa cha, Kashmir zawpizy, ama khotalaina zydua kohkipa ta ama yna zie a châpa vâta a châ” a tah hra.

- The Wire