Jammu & Kashmir : Zawpi nata pheisaih atlahnaona liata chyhsa 150 hleita hmah ama phaoh

SRINAGAR, India (Reuters) – Kashmir liata India sawhkhâ ta kohkina (Restriction) a icha viapa viapa a siekhei tarawpa ta, Chutyhnoh khata zawpi palôhtlâhleipa palâsatuhpazy nata pheisaihzy atlahnaona tlôpa ta, alô ta pheisaihzy he tlahnaopa châ ei ta; pheisaihzy heta mothlih tlana hlyu (Tear gas) ta zawpi he achhypalie hra ei ta, hmahphaohpa chyhsa 150 hlei ama ypa hawhta Reuters chata a palâsa. He hmo he Kashmir chhôh, Soura District liata a tlôpa châ ta, atahmâ hâta chhôhta zawpi palôhtlâhleina palâsana ei 4-na a châ ha bâ.

Pheisaihzy chata he palôhtlâhleina palâsana Soura he kohki achhuahpa ta tei hai ei ta. Palôhtlâhleina palâsatuhpazy heta Srinagar liata chhao châtawhpa (Poster) hmô awpa ypa ta, U.N. Military Observer Group for India and Pakistan (UNMOGIP), taihta lâthlôh a chhihpa ta, India bietluna ama kholeinazie palâsa amâ chhuahnazie châtawhpa liana heta palâsapa a châ.

UNMOGIP he kô 1949 liana khata paduapa châ ta. Kashmir achhupa ta India nata Pakistan amâ dyuh tuachaipa a pai tawhta paduapa a châ. He py heta India nata Pakistan râhri liata akachaheihna (Ceasefire) dâh paraona ama kohki tyh.

Palôhtlâhleina palâsana lai chaipa Soura liata cha, lâthlôhzy alô nata thua ta pakhâpa a châ tarawpa ta, zawpizy ta alô hmâpa ta pheisaihzy tlahnao ei ta; pheisaihzy heta Tear Gas nata âhiah Grenade ta avaw chhypalie taraw hra ei sala, zawpi palôhtlâhleipa palâsatuhpazy heta alô ta athata ama vaw vawh lymâpa vâta hnôh amâ sy ha heih tyh.

Pheisaihzy heta Soura he a ngiahnao hmeiseih a chhuahpa ta tei taraw hra ei sala, a ngiahnao hmeiseih thei vei ei.

- Reuters