EURO 2020 Qualifying : Kheihawhpa râh zy ta Euro 2020 akhaih thei aw ei?

Europe râhhlypi liata Football ataopasuana lai chaipa, 2020 European Championship liata akhaih thei awpa tluana, hâta hmiatuapa liana khata Europe râh nano nanopazy ta ama hmiachhy ha heih. European Championship 2020 liata akhaih thei awpa tluana he kheita ma siekhei ei ta, ahyzy ma tloh thei awpa duasu liata a duah ei, tahpa eima moh heih tua aw.

                                                                                      

Kheita akhaih thei awpa tluana cha siekheipa a châ?

Euro 2020 akhaih thei awpa tluana liana heta râh nano nanopa zy cha Group 10 lâta pachhaihpa châ ei ta, Group 1 liana heta râh 5 tawhta râh 6 taihta ama lymâ. He Group 10 tawhta Point hmô hluh chaipa râh 2-pazy cha Euro akhaih thei awpa heta ama tlohpâ ha tahna châ ta. Euro 2020 liana heta râh 24 amâ hlao aw.

Euro 2020 liata akhaih thei awpa tluana hmiatua chaipa he târi 21-23 Pamih 2019 khata pathaopa châ ta, târi 17-19 Phiapi 2019 khita patlôpa a châ aw.

Atahmâ ta Euro 2020 akhaih thei awpa tluana liana heta Group to liata 3-na zy châta ‘Play-off’ y leipa aw ta. He vyuhpa heta, Nations League liata ama Group liata a taopha chaipa râh 16 zy châta deikua Euro 2020 Qualifying round liata Group liata 1-na nata 2-na ama châ thei leipa chhaota ‘Play-off’ hawhta Euro 2020 amâ khaih theina awpa kao deikua taopa a châ aw. He hawhpa duasu liana heta England nata Scotland zy cha ama y hai hra.

Nations League liata a taophapa râh zy he Euro 2020 liata akhaih thei awpa ta ‘play-off’ a ngiah leipa ta ama vaw tloh khai hapa ta a châ khiahta cha, Nations League liata 3-na duasu a topazy ta ama suruapa he ama kaw pabie heih hra aw.

He ‘play-off’ liata  â khaih awpazy he târi 22 Phiapi 2019 khita a daopa châ aw ta, târi 26-31 Pamih, 2020 liata semi-finals nata finals pakhaihsapa ama châ aw.

Euro 2020 Qualifying Round liata amâ vaw piechhie hapa chhaota ‘play-off’ duasu a to chhielie hapa râh zy cha :

League A: Portugal, England, Switzerland, Netherlands

League B: Ukraine, Denmark, Bosnia-Herzegovina, Sweden

League C: Finland, Norway, Scotland, Serbia

League D: Georgia, Belarus, Macedonia, Kosovo

Râh nano nanopazy duasu

England nata Northern Ireland zy ta ama hmiachhypa maih pahnie lymâ chypa ta ama Group rairie liata sâkhana ama châ hai.

England heta ei thôh amâ khaih hapa liata pahniena to khai chy ei ta, Czech Republic cha 5-0 ta pahnie ei ta, 5-1 ta Montenegro pahnie heihpa ta, 4-0 ta Bulgaria cha Pachyhzâ khata ama vaw pahnie ha heih hra. Ama Group liata sânona, Kosovo chô liata ypa ta, Point kha ta amâ sâh via.

He hawhta a châ nona heta Group C liata Northern Ireland ta ei palih amâ khaih hapa liata pahniena to khai chypa ta, sâkhana duasu liata a duah hai ei ta. Hriatuazâ heta Germany ama hmiachhy aw. Ryan Giggs mohôhna ry liata Wales cha Croatia nata Hungary pahnie leipa ei ta. Azerbaijan deikua Gareth Bale goal khôpa hmâpa ta 2-1 ta ama pahnie.

Ryan Giggs nawhta sahlaozy he Group E liata sâthôhna liata y haipa ta, Group E hmia asahtuhpa Hungary nata Croatia,-zy hlâta Point 3 ta amâ hnai via chy.

Scotland ta tlô awpa amâ ngiah kaw nota, Russia kao lâta ama pangia tua tawhta Russia heta 2-1 ta ama pahnie ha heih.

Scotland he Group I liata 4-na liata y hai ei ta, Group I hmia asahtuhpa Belgium, hlâta Point 9 ta amâ hnai via.

He hawhta a châ nona heta World champions France cha Euro 2020 liata chhao Champion awpa ta pangiasa chaipa châ pyly heih ei ta, Group H liata Point 12 hmôpa ta hmia amâ sah hai.

Spain chhao Group F liata thlalôh kawpa ta y hai ei ta. Ei pangawh amâ khaih hapa liata pahniena to khai chypa ta, goal 13 po khô ei ta; goal 3 ngâlâh ama pathlie chy.

Netherlands chhao Group C liata ama duasu papha awpa ta vaw kua pathao ha heih ei ta, Hamburg liata tlyliah hneituhpa Germany cha 4-2 kei pahniepa ta – Liverpool player Georginio Wijnaldum nata Barcelona player Frenkie de Jong zy cha goal khôtuhpa hryta amâ hlao hra.

Netherlands he kô 2018 World Cup liata ama tloh khao leipa khata Euro 2020 liata akhaih thei lei awpa china pie thei ta; cha nota he he ama palôh liata khâ a y awpa vâta amâ pielyuzie liata yzie a hnei kaw thei hra aw. will be under huge pressure to qualify for Euro 2020 after failing to make it to the 2018 World Cup. Group C liata ei no pahnie to chy ei ta, atakô kô thaona lâta Germany ta ama râh liata ama pahnie tawhta, ama kei pahnie palie ha heih hrapa chata âmo liata sasyh a ngâna a sapapua thei hra.

He hawhta a châ nona heta, Cristiano Ronaldo râh Portugal chata Group B liata ei no tlai amâ khaihkheipazy nahta amâ pahniethai tawhta, pahniena hmiatuachaipa ama hmô ha hra. Portugal heta Serbia cha 4-2 ta ama khichhaina tlyliah Belgrade liata kei pahnie ei ta, châhrasala hmia asahtuhpa Ukraine cha Point 8 duata a kho mâh vei ei.

Italy ta Group J liata ei charu amâ khaih hapa liata pahniena to khai chypa ta, Pachyhzâ akhaihna liata Finland cha Chelsea midfielder Jorginho penalty hmâpa ta 2-1 ta ama pahnie.

Republic of Ireland cha Group D liata point 11 hmôpa ta hmia a sah hai ei ta, Denmark hlâta point 2 ta a sâh viapa ta; Switzerland, hlâta point 3 ta amâ sâh via hra.