FIFA World Cup 2022 Qualifiers : India ta Asian Champion Qatar ama pakhâ

India chata Guwahati liata Oman amâ pahniesa tawhta, kô 2022 FIFA World Cup tlôtuh awpa, Qatar cha ama tlyliah liata kei hmiachhy heihpa ta, India heta Asian Champions Qatar he 0-0 ta a pahniethaipa ta, Point 1 ama hlao papua.

Hriaheihzâ ta FIFA World Cup 2022 akhaih thei awpa tluana liana heta, tlyliah hneituhpa nata kyhtotie liata a pha viapa tah thei awpa, Qatar heta ball to hluh via ei ta, châhrasala India kao chhôh liata ball chapie pangia thei vei ei. Qatar he FIFA World Cup atlôtuh awpa, a tloh pachie hapa châ ei ta, he akhaihna he kô 2023 AFC Asian Cup akhaih thei awpa tluana a châpâpa vâta India he pahnie cheingei achhuahpa ta ama teikhâ lymâ. Qatar heta amâ khaih tuachaipa liata Afghanistan cha 6-0 ta vaw taochhie ha ei ta. Ama tlyliah liata khichhaipa India 0-0 ta amâ pahniethaikheipa heta chyhsa hluhpi no a pa-âh kaw.

Qatar ama hmiachhy awpa he India châta akhaihna rairu chaipa a châ awpa hawhta vaw rei chhielie hapa kha châ ta. India he FIFA Ranking liata 103-na liata y hai ta, Qatar deikua 62-na liata ama y. India heta Qatar he ei charu hmiachhy ha ei ta, ei 2 a pahniethai ei ta, ei 4 cha India he pahniepa ama vaw châ ha.

India he ama striker Sunil Chhetri a hlao leipa ta akhaihpa châ ei ta; châhrasala, India player zydua apiepasana nata Qatar player-zy ama teikhâna dâh a mopha ngaita kaw.