Indonesia : Losihpa liata a thipa zie chyhsa 23 ama tloh ha

JAKARTA: Maluku Liahpahlôh, Indonesia liata lo asihpa liata a thipa zie cha 23 tloh ha ei ta, chyhsa 15,000 hlei tlai zy cha su a boh viapa lâ paly hapa ama châ hra.

Pohbienoh khata Maluku liahpahlôh liana heta 6.5 Magnitude-ta pasapa lo a sihpa ta, lo asihpa heta O nata lyu hleikhôta lâthlôh vâro tlai a parao.

Chyhsa 23 a thipa hry liana heta hawsaihpa pakha â hlao tahpa pasia hapa châ ta; hrona a pahleipazy he O chopa ta a vipa zy ama châ via chai.

Indonesia liata chhiena atlôna kyh liata hmahlatuhpa biephuatuhpa Agus Wibowo chata, “Chyhsa 23 ama thi” tahpa phuahpa ta, chyhsa 100 hlâta hluh viapazy ta hmah phaoh ei ta, losihpa ta ama o nata lyu a parao hapa chyhsa 15,000-zy chhao su a boh viapa lâ paly hapa ama châ, a tah hra.

He losihpa heta O za hluhpi a parao hleikhôta, Office zy, school zy nata vâtlâh O nata hmozy a parao hluh kaw. Losihpa ta a paraopa O nata lyu a hneituhpazy châta poh-o, amâ chhaina awpa pachhuahpanohpa a châ.

US Geological Survey chata he lo asihpa he Ambon, Maluku maw-nochhi lâta km 37 ta â hlapa liata avaw thaopa ta, â vaw thaona a pathuhna lâ he km 29 a châ, ama ta.

Indonesia liana heta lo asih hoh kaw ta, zâkô 2018 liana khata Palu, Sulawesi Liahpahlôh liata 7.5-magnitude ta pasapa lo â sihpa ta, chyhsa 4300 tlai cha ama yna chybia pahno khao leipa nata hrona a pahleipa ama y heih.

Kô 2004 liana khata Sumatra liata 9.1-magnitude ta a pasapa ta lo a sih heihpa ta, Sumatra nata a chheipâh liata a pahrâpa chyhsa 220,000 tlai thi ei ta, Indonesia liata chyhsa 170,000 ama vaw thi ha hrapa kha a châ.