Khihtlâh avaw pathaih thei n'awpa ta hnaihny chalei lymâ

Mara Thyutlia Py (MTP) Branch : Meisavaih West chata ama khitlâh avaw pathaih via lymâ n'awpa ta, kao nano nanopa ta hmahlana siekhei pazao lymâ ei ta, Thlarâh târi Noh 1 tawhta cha, Khairie nata âhniahnipa (Plastics and its kind), apuapa byh (Garbage Bag Medium) hmoh kha, ₹20 ta ama chalei lymâ ha bâ.

He hawhta hmahlana he, Awnanopa Py (KHP) nata hriaparaohpa châ ta, he thâtih patohpatia hai nona heta, sykhao 40 hlei Hawti penawhzy ta apuapa ama pakhypa cha ama vaw chalei ha bâ. He apuapa chalei n'awpa heta, Chhihtuhpa sahlao ta sôhthih ama hneina hawh chyuta athyupakhy ei ta, abyuhna hawhta thyuchhi via lymâ awpa chhaota ryraona ama siekhei hai.

Meisavaih West MTP he, Youth Club chhao paduapa ta, atakô 'Swach Bharat Summer Internship' liata, Siaha District pôhpalôhpa liata pathaih chaipa Khih/Vaih sâkhana(1st) lymâ la awpa ta atlyhpa châ ei ta, âmo he State Level liata District vyuhpa ta azaohna ama hmiachhy heih aw.

Meisavaih West MTP chhao heta, MADC LAD Dept. lâ tawhta Khihtlâh pathaina châta hmahla awpa ta ahawna ama hmôpa hawhta, 'MEISAVAIH WEST CHILDREN HYGIENIC CLUB' chhao paduapa ta amâ phana rakha chyu liata, khihliah pathaina rai ama siekhei hai hra.