Lawngtlai : Parihpi ta a chazei khai hapa a viasapaw a pachhapapua

Pakhynoh târi 18 Thlarâh, 2019 khata Puhpa Lalvenhima nata a viasapa Satlia Lalhriata S/o Dengthanga, Lawngtlai Council vaih-pa cha ama motor hmâhtuhpa (hire) chanôzy nahta 'Khawthlang Tuipui' (Lawngtlai West) lâ sie ei ta, Bungtlang South khih pangaina lâtlei liata pazô sâh awpa ta a duah ei ta; Puhpa Lalvena (Driver) cha motor tawhta pua ta. Tihrykyh (Side drain) liata a pazô cha kei sâh ta; he tihrykyh liana heta Parihpi he vaw y thlâh ha ta! Puhpa Lalvena he parihpi heta thlai vaw tlahnaopa ta, chazei pâ lymâ ha ta, a viasapaw satlia riahphapa, Lalhriata, Lawngtlai Council vaih chata thlai vaw pachhapa ta, kuruapa ta Parihpi cha a rao liata patu ta, a viasanô hnohna chata tâkô pie awpa ta awsao ta. Parihpi he a thie hapa a châ.

Puhpa Lalvena ta a reina dâhta cha, "Pazô sâh awpa ta ei puapa cha a zoh hapa vâta, lâkiah liata tlâ sâh na ta. Ei pazô sâna liana chata parihpi cha a vaw y thlãh hapa he châ ta, hmo a tielawpa cha pahno tlai na ta, 'Parih' ei kaw tahpa cha eina vaw chazeipâ ha, thlahzoh kawpa ta Hriata cha aw para na ta, na vaw bao awpa ta aw na ta. Hriata chata cha sai khiahma ei so tahpa ta, 'Na pazô sâpa cha bao nâ ngiah tahna a châ naw' na vaw tah ta. Parihpi ta ei ku a chazei khai hapa vâta a pie thei khao vana; chapâna chôta 'Na vaw bao para tyh' tah heih na ta, Parihpi chata na chazei ta, ngazo liata eima pano ta eima tla haw. Hriata cha cha â vaw zaw pathlah hra tahpa pahno na ta, a hropa la khâpa hmahta pahno khao vana.," a ta.

Lalhriata ta a reina liata cha, "Ei zâ zaw pathlah hrapa kha Parihpi cha a rao liata patu pasu chho na ta, ei chapiepâ hra, Puhpa Vena he a chapie papua. Motor hmâhtuhpa chanô kha tâkô na vaw pie awpa ta tah na ta, parihpi cha tâkô ta athapi ta chhawh na ta, eimâ tu tah thei awpa a châ" a ta.

Puhpa Vena cha parihpi ta a chazeina tawhtapa ama pathlâ tawhta, buakheipâ lymâ ei ta, ti ta zy padâpa ta buakhei ei ta, â kaw theihlô ha heihpa a châ.