Mizoram District 8 khihpi hryta Siaha khihpi duasu chi a chhih chai

Mizoram district khihpi sâcharie hryta Siaha khihpi cha khihpi laina lâ tawhta reipatipa ta zakha lymâ liata leichopa vâta chhiena tlô theina kyh liata a duasu chi a chhih chaipa ta, Kolasib cha â boh chaipa ta palâsapa a châ.

Atliata palâhâhpa, ‘Hazard Risk & Vulnerability Analysis of eight district headquarters’ liata palâsapa a châna dâhta cha, Mizoram district khihpui 8 zy duasu achupasiana hneipa liata khihpi sâchariepazy he chhiena nano nanopa - leichopa, thlihpi nata losihpa chôchâh liata athaisopazy achupasiana palâsapa châ ta. Leichopa liana heta Siaha khihpi cha leichopa tlô theina ‘chance’ a sâh chaina khihpi châ ta, khihpi sq.km 27.26 hryta 0.85 cha leichopa tlô theina su châpa ta, leicho theina ‘chance’ â sâh chai ta, Siaha khihpi 3.11% cha leicho theina su liata a ypa hawhta pahnopa a châ.

Siaha pazipa ta Serchhip nata Lunglei cha a pazipa ta leichona theina chance a sâhpa châ heihpa ta, khihpi 1.84% cha leicho theina su liata a ypa hawhta pachâpa châ ta, Aizawl 1.32, Champhai nata Lawngtlai 0.49, Mamit 0.43 nata Kolasib 0.35 zy ta ama pazi. He he khihpi kawhna lâ tawhta reipatipa a châ. Leicho theina su kawhna lâ liata cha Aizawl khihpi kawh chaipa ta, sq.km. 2.05 cha leichopa tlô theina (high risk zone) liata a y.

Science & Technology ry liata Mizoram Remote Sensing Application Centre (MIRSAC) liata hriatuhpazy chata leichopa cha a râh ytuzie (terrain) reizie ta zy, râh leilô hriahrâna dâh (chaona) liata â pahnieh kaw tahpa ama rei.

Thlihpi (Wind & Cyclone) pathli tyhpa nata a pasana lâ kyh liata Building Material & Technology Promotion Council (BMTPC)-ta India râhpôhpalôh pahlypa ta a pachhaihna dâh liata cha Zone a sâh chaipa ‘Very High Damage Risk Zone – A’ liata Mizoram pôhpalôhpa he a y hra. MIRSAC-ta âchupasiana liata cha Mizoram he Zone 3-lâta pachhaihpachhuah heihpa châ ta – Very High Zone liata 17.68% y ta, High Zone liata 34.50 nata Moderate Zone liata 47.82% y ta, Mizoram chho lâ liata Very High Zone he a hluh viapa a y hra.