Serie A : Ronaldo ta atahmâ Season liata a goal hmiatuachaipa a khô

Serie A akhaihna mo pha kawpa liata, goal 7 po a ngiana akhaihna liata Juventus ta Napoli pahniepa ta, Cristiano Ronaldo ta atahmâ Season liata a goal hmiatua chaipa a khô. Napoli nata Juventus zy he daihti chhâ chy taihta ama goal duasu â kho ta; vâduachhih kawpa ta Napoli player Kalidou Koulibaly ta daihti piechhipa liata ama kao lâ pangia tlamawpa ta, 4-3 ta Juventus ama tlô.

Serie A Champion haipa, Juventus heta Danilo, former Napoli striker Gonzalo Higuain nata Cristiano Ronaldo-zy goal khôpa hmâpa ta 3-0 ta hmia a sah lymâ ei ta. Châhrasala Juventus goal thôhpazy he Napoli ta nopi player apasiena daihti liata ama lapangiapa pathôh - Kostas Manolas, Hirving Lozano nata Giovanni di Lorenzo zy ta amâ kaw pasu khai ha heih. 3-3 châ ta, daihti a chhâ daihmâ ha bâ.

Daihti tyhpa chhã ta, daihti piechhipa 90+2 liata Juventus ta 'Freekick' ama za chapiepa cha, Napoli player Koulibaly ta a ngialy ta vaw ly chheipa ta, ama kao lâ a pangia haw. Daihti chhâ ta, 4-3 ta Juve ama tlô hapa a châ.