Delhi khihpi liata O kâpa liata chyhsa 43 ama thi

Abeipanoh myrâh, my dawh 5:00 rachhôhta India khihpi Delhi liata Anaj Mandi vaih liata O kâpa vâta hrona a pahleipa zie cha chyhsa 43 tloh ha ei taa. Meikâ pachhaituhpazy nata pachhapapuana raihriatuhpazy ta chyhsa 50 ama pachhapapua ha hra.

Delhi Police chata Abeipanoh my ta O kâpa liata hrona a pahleipa zie he pasia ha ei ta; chyhsa 56 ta hmah ama phaoh tahpa chhao ama pasia ha hra.

Fire Department ta India News channel miakha, India Today TV, ama chhona dâh liata, O kâ haipa chôchâh Phone tawhta chhopa châ ei ta, he O kâpa liana heta chyhsa vâro tlai amâ tâh hai, tahpa deikua chhopa châ vei ei, tahpa ta, he heta athata pachhapapuana kyh liata rairuna miah a taopa, ama ta.

He meikâpa liata hmahphaohpazy ama ngaikheina su, LNJP Thohna-O biehneituhpazy chata, hmahphaohpa amâ vaw chhipa hluh viapazy cha ama hrona pachha hmâ khao vei ei, tahpa reih ei ta. Hmahphaohpa hropazy cha RML Hospital, Lady Hardinge nata Hindu Rao Hospital ngaikheipa ama châ hra.

He Okâpa liata a pahrâpa hluh viapazy he hmotaopapuana su (Factory) nano nanopa liata ahriapa châ via chai ei ta; he O hneituhpa he he thâtih pachhuahpanoh hai nona heta Police zy ta ama tlua hai.

Deputy Fire Chief Officer Sunil Choudhary ta a reina dâhta cha, "He O kâpa laina lâ he 600 sq feet châ ta. A chhôh he zoh kaw ta. He su he siku sahria (school bags), chhiehra-ôh (bottles) nata chhai hmobaoh hropazy ama pasona a châ" a ta.