Article : CHI AWPA DOPA - By Rev.Dr Laiu Fachhai

Mara Krizyhai hluhpi ta ahmawh, asi, dyuthaipa, thohnathaipa, pachaothaipa nata pachhopakhawpa hluhpi china sei liata eimâ tâh chy. Eimâ chhypa Khazohpa he Khazohpa thatlôpa (Isai 9:6) eima hnohta a ypa Khazohpa Imanuel na a châ tahpa eima my ha tyh.

Tlâhna khoh tu vâta Krizyhpa â tahpa thokha chhao, ahripa hmotaotheina ta patlâhna a tao thei tuhpa ta â reihpa pachaothaipa nata thohnathaipa nata phukipa zy ama ngai thlâh ha chy. A pei kaw.

Chi awpa dopa cha moleina taopa châ ta, eima chi chai awpa cha eima hnohta a ypa, atopahnotuh, atotaothei nata su to liata a ypa Khazohpa  a châ.

Eima pôhna hnatlâna a parao thei awpa nata eima hro maniah a pachyusa awpa hmozy chhao chi ngaita awpa châ taraw ta châhrasala, chazy cha chi leipa ta, a chô liata ahmawh, asi hawhpa zy khi tlao eima chi via.

1. Ahmawh hlâta sâdâ chi â chhih via.

2. Asi hlâta châhnamei chi â chhih via.

3. Dyuthaipa hlâta kuvâ chi â chhih via.

4. Pachaothaipa hlâta karaoti chi ô chhih via.

5. My my kha ta chhôhkha nochhi notla sie nanopa hlâta ku a si leipa ta pati niepa chi â chhih via.

Ahmawh zy hawhpa chhochhi he cha, a y leipa eima chipa chô ta, dyuthaipa nata pachaothaipa zy he haiphipa nata chyhsa dôveipa ta nie a tluapa ama châ. Asi chhao he hrozô ti byhnâ châ ta, chi awpa châ vei. Pachhopakhawpa hropa zydua chhao he a hmeiseihpa châ tlâ veih ei.  Chi awpa châ veih ei.