Mizoram : Kô 7 chhôhta Nieparupa chyhsa 20 hriepa ama châ ha

 

Mizoram liata kô 7 a khô hapa chhôhta nieparuna/avyuhna (corruption) nata â hniahnipa vâta hriepa (lô-O liata khôpa nata phusâ pacheisapa) chyhsa 20 y ha ei ta, he hryta chyhsa 5-zy cha Congress sawhkhâ daihti no, kô 2013-18 chhôhta hriena piepa châ ei ta, mo hropa chyhsa 15-zy cha MNF sawhkhâ tawhta, kô 2019 nata 2020 ta hriepazy ama châ.

RTI hiahrihna Vigilance department achhyna liata â lâna dâhta, kô 2013-18 chhôh khata preliminary enquiry 86 roh pangiapa y ta, reguler case roh pangiapa 39 y ta, preliminary enquiry pasipanôpa 94 ypa ta, regular case pasipanôpa 50 a y.

He daihti chhôh heta corruption nata â hniahnipa biebuapa liata chyhsa 5 hriepa (thailei pachâsapa) y ei ta, chanahzy cha riethei kawpa ta kô 1 lô-O a tâh awpa nata Rs. 10,000 cheih awpazy, riethei kawpa ta kô 1 lô-O a tâh awpa ta nata Rs. 20,000 cheih awpa ta zy, riethei kawpa ta kô 4 lô-O a tâh awpa ta nata Rs. 2,00,000 cheih awpa ta zy, riethei chhih kawpa ta kô 3 nata thla 6 lô-O a tâh awpa nata Rs. 50,000 cheih awpa ta hriepa hleikhôta, riethei kawpa ta kô 4 lô-O a tâh awpa ta nata Rs. 50,000 cheih awpazy ta hriena piepa ama châ.

Kô 2019 nata 2020 chhôhta preliminary enquiry roh pangiapa 21 a ypa liata 11 pasiapanôpa châ ta, regular case roh pangiapa 11-liata case 8 pasiapa a châ.

He daihti chhôhta hriena piepa chyhsa 15 hryta 10-zy cha Rs. 10,000 sai pacheisapa ama châ hleikhôta, ama cheih awpa zie ama pie thei leipa ta a châ khiahta cha simple imprisonment thla kha chhôh siepahlie awpa ta hriena piepa ama châ.

Hriena piepa hropazy cha, riethei kawpa ta kô 4 chhôh lô-O a tâh awpa ta nata Rs. 1,00,000 cheih awpa ta zy, riethei kawpa ta kô 5 lô-O atâh awpa nata Rs 5,00,000 cheih awpa ta zy, riethei kawpa ta kô 3 lô-O a tâh awpa ta zy nata Rs. 5,00,000 cheih awpa ta zy, riethei kawpa ta kô 3 nata thla 6 lô-O a tâh awpa ta nata Rs. 30,000 cheih awpa ta zy, riethei kawpa ta thla 1 lô-O a tâh awpa ta nata Rs. 25,000 a tâh awpa ta zy hriena piepa ama châ.

-      ZALEN