J&K liata chyhsapa khotalaina kohkipa ta a ypa he biehneina hmâ chheina a châ – Supreme Court

New Delhi: Sawhkhâ ta Internet nata zawpi apielyuna kyh liata kohkina daihti vâro chhôh tlai a siekhei tawhta, Kashmir zawpizy châta thâtih lychhihpa, India ryureina a sâh chaipa Supreme Court chata atanoh khata papuapa ta, daihti bitaipa y leipa ta Internet pachhâsapa cha biehneina hmâ chheina a châ, tahpa ta Jammu and Kashmir biehneituhpazy cha hâta eikha chhôh khata kohkina ama siekhei haipazy cha mohpathi (Review) awpa ta a pahnosa.

"Zawpi khodâh hawhta a pielyuna, Internet nata khotalaina pakhâpazy cha biehneina hmâna dâh dopa châ vei," tahpa ta Supreme Court chata, "Sawhkhâ chô liata palôhtlâhleina reipa nata sawhkhâ bietluna liata kho a khi leina palâsana cha Internet pachhâsana awpa chhâpa tloh vei."a ta.

"Internet pachhâsapa a châpa cha mohchanei parapa châ sala. Daihti bitaipa hneipa ta Internet pakhâna he siekhei awpa a châ," tahpa ta Supreme Court chata Jammu and Kashmir liata sawhkhâ hmahlana siekhei haina dâh akhona kyh liata bie a pachia.

India sawhkhâ ta India dâhpipa liata Article 370 a pahluh tawhta Jammu and Kashmir liata dâh nata phôh siekhei hapa nata siekhei haipa zydua cha zawpi pahno awpa ta palâhâh awpa a châ, tahpa ta, he heta he dâh zy akhopaliena kyh liata hmahsiena a siekhei aw, a ta. He hawhta zawpi apielyuna nata Internet pakhâna siekheipa a châpa vâna heta, Thlazoh noh 5, 2019 tawhna khata J&K liata Politician vâro tlai cha khôtho pua thei lei awpa ta kohkipa ama châ hai.

"India dâhpipa liata Article 19 liata khodâh hawhta bierei theina, pachâna phuahlua theina khotalaina tahpa liata Internet hmâ theina he â hlao," ta Supreme Court chata sawhkhâ a pahnosa.

Justice NV Ramanna, chata he Supreme Court bietluna a reihpapua nona heta Charles Dickens phôhpa ropa ‘A Tale of Two Cities’ bie pathaona reihpapuapa ta:  “Daihti pha patluana daihti a châ raohpa ta daihti pha lei chaina daihti châ pyly ta, sona novâhna hryta hruna chhao khotalai kawpa ta a chareina daihti a châ pyly hra...” (It was the best of times, it was the worst of times, it was the age of wisdom, it was the age of foolishness...) tahpa ta a biereipa a pathaopa chata nah a charao kaw..