Mizoram : Chanô kupathlana chhâpa hluh chaipa ‘Sahma’ vâta - Nohchareih chyhsa 10 ta Helpline bie a chho tyh

Aizawl: Universal Women Helpline Mizoram chata July 2016 tawhta November 2019 likah chhôh khata âmo bie a vaw chhotuhpa chyhsa 4705 y ei ta, he he reipatipa nohkha ta chyhsa 10 lymâ ta ama baona amâ vaw haw tyhpa hawhta a châ. Chanô hry ta kua pathlana tlô hluh chaina chhâpa cha Sahma a châ.

Universal Women Helpline ta âmo bie a vaw chhotuhpa chyhsa 4705 ama hneipa hryta chyhsa 2663 he rairuna a tyhpa chanôzy ta bie amâ vaw chhona zie châ ta, a hropa 2042 he ama chhôhkha nata viasapazy ta bie amâ vaw chhopapa ama châ. UWH chata rairuna vâta âmo a vaw ngaituhpa hry liana heta case 849 taopa ta, he hryta â khophie hlâta hluh viapa case 575 he Aizawl khihpi chhôh liata a pahrâpa châ ei ta, a hropa 274 he Aizawl khôtho lâtapa ama châ. Case ama hneipa hry liana heta chanô vahpa a hnei haipazy cha a taotuh chaipa châ ei ta, nôpi-nôvah achhaih tawhta rairuna a tyhpa vâro tlai ama y hra. Rairuna a tyhpa chanô hryta kô 21-40 likah ama hluh patlua chai.

Chanô taolapa/kupathlapa a taopa hryta ama vahpazy ta ku ama pathlapa hluh chai ei ta, âmo pazipa ta ama khopawnah zy ta ku ama pathlapa ama luh chai heih hra. Chanô ta taola/kupathla amâ tyhna chhâpa hluh chaipa he ama vahpa/khopawzy ta sahma ama paripa vâta châ ta, thohna paripa vâta kupathlapa chhao vâro tlai ama y hra. Chapaw hluh viapazy cha ama pari lei no/tlâh no ta sia kawpa, châhrasala sahma/thohna ama pari tawhta amâ kaolâhpa chanôzy ku pathla a hmâhpa ama y.

Biehnawh - Zalen Thatihbu, Aizawl