Mizoram : Thohna hmâchheina vâta a thipa hryta 88%-zy cha chapaw ama châ

Aizawl: Mizoram liata kô 1984 tawhta kô 2019 inkar chhôh ta thohna hmâchheina vâta hrona a pahleipa chyhsa 1578 y ei ta, he hryta 88.33% cha chapaw ama châ.

Excise & Narcotics department ta ama ngiana dâh liata kô 2019 chhôh khata thohna hmâchheina vâta a thipa zie he Mizoram liata chyhsa 54 y ei ta, he hryta 42 he chapaw châ ei ta, chanô 12 ama y hra. Thohna taotyhpazy thikheipa hluh chaipa he heroin châ ta, heroin vâta a thipa he 27 châ ei ta, a hropazy chhao he Heroin nata a hropa a tao pahlao tyhpazy ama châ.

Department ta ama ngiana dâhta kô 1984 tawhta zâkô kôchhâna taihna khata Mizoram liata thohna hmâchheina vâta hrona a pahleipa zie cha 1578 tloh ha ta, he hryta 1394 he chapaw châ ei ta, thohna hmâchheipa vâta chanô a thipa zie cha 184 ama châ ha hra.

Kô 1984 nata kô 2019 chhôhta thohna a thikheipa hluh chaipazy he proxyvon/parvon spas vâta a thipa châ ei ta, he thohna vâta hrona  a pahleipa zie cha 1161 ama ypa ta ngiapa châ ta, heroin vâta a thipa 215 y ei ta, a hropa 202 he thohna nano nanopa a tao pahlao tyhpa ama châ. Kô 2017 tawhna khata proxyvon vâta a thipa y khao leipa ei ta, heroin cha drug cha thohna a tao tyhpazy thikheipa a lâluah chaipa a châ ha bâ.

END heta zâkô chhôh khata heroin kg 12.596 patu ei ta, ganja kg 370.068, methamphetamine hmô 1439964 nata pseudoephedrine kg 90.692 ama patu. Sahma (Pathlaohpa) litre 95665, sahma pathlaoh haipa 137733 patupa ta paritheipa nahta ahniahnipa liata ahluahtheipa 208 ama patu hra.

Excise department heta NDPS Act 1985 ry liata chyhsa 1053, MLP Act ry liata chyhsa 1332, MLPC Act 2014 ry liata chyhsa 688, Mizoram Excise Act 1973 ry liata chyhsa 146 nata  paritheipa nahta ahniahnipa liata râh hropa chyhsa 35 patupa ama châ hra.