INDIA : Akhawhlôhna (Lockdown) 4.0 hmâ pazaopa a châ ma?

State 5 CM-zy ta Akhawhlôhna pazao awpa ama khoh

May 12, 2020 (MSR) : Zâhnia ta India PM Narendra Modi-ta Video - conference hmâpa ta State Chief Minister zy â pakyhna liata, atahmâ duasu mopa ta Covid-19 vâta India râh akhawhlôhna (lockdown) ei 3-na hmâ haipa, May 17 ta pahluh (exit) n'awpa dâh liata, pahluh leipa ta Lockdown ei 4-na pazao heih awpa eima lyu kaw. PM Modi chata akhawhlôhna tlokhuhta pahluhpa cha â thei lei hmi kaw, tahpa Chief Minister sahlaozy he a chho ei.

Lockdown pahluh nata pahluh lei awpa kyh zy, Economy a kaw veipâna dâh zy nata State hmahlana nata ryraona (plan) zy cha May 15-17 chhôhta PM heta pangia awpa ta, Chief Minister sahlaozy he a chho ei.

Chief Minister papangawh : West Bengal, Bihar, Telegana, Tamil Nadu nata Chhatisgarh zy chata Akhawhlôhna pazao awpa khoh ei ta. Tamil Nadu Chief Minister chhochhita cha, zawtheina nata train service zy chhao May 31 taihta pachhâsa awpa a khoh hra. Railways chata Abeipanoh zâlâ khata, May 12 tawhta Train 15 parâsa awpa ta ryraona a tao hra.

Punjab CM Amarinder Singh nata Kerela CM Pinaryi Vijaya zy chata, su thokha deikua lockdown leipa ta pahy awpa khoh ei ta, cha su zy cha Covid-19 hri chareipa ta a pabua leina su zy ama chã.

Chief Minister zy chata, State sawhkhà hnohta "Financial package" nata State finances khoh ei ta, Good and Service Tax (GST) zy chhao Central sawhkhâ ta state liata la mâh leipa sala, economic taopathina awpa ta ama tah hra.

PM Modi chata "Do gaz doori" (yard 2) chhâ ta â hla awpa nata "Zâ daihti liata khôtho pua awpa pakhâna" (night curfew) zy chhao reihpa ta, Rail zy chhao economic saipa ta parâsa awpa â ngiahpa ta a pahnonazie zy, lâthlôh (routes) zydua liata deikua â ryh thai thlyu vei, tahpazy a reih hra. May 17 khai tawhta India râh pôhpalôhpa "lockdown" pazao nata pazao lei deikua sia mâh vei.

News Channel thokha ta atazâ dawh 8:00Pm heta India PM Modi ta TV siepahliepa ta India zawpi hnohta biereina a hnei aw, tahpa ama palâsa.