Mother's Day Special : EI NÂ - Damary P.Hlychho

EI NÂ, Kyh ei pachâ chaipa, nâma hawhpa nô phapa he keima châta ei hrozô chhâ lia y khao aw vei ei. Na tlâh lei no chhaota, noh sahpa nata vâsuapa chhao papeisa leipa ta, keimo vyuhpa ta rai khà vaw hria tyh chi ta.

EI NÂ, keimo vâta apahâ hmà leipa ta thlaisáh chhaota raisàh na hria tyhpazy ei pachàh nah ta la ei palóh a pasa kaw tyh.

Ei Nà, reikah pasa kawpa ta eimà chà hrâhnao no chhaota, kyh miah na pachâpa vâta nâ la bie kawhkha hmahta reih beih va chi. Nâma tluta chanô siapa nata àreisipa he ama y khao vâ ma i, tahpa ei pachà tyh.

Ei Nà, na palóh eicha pasasa kaw no chhaota, na hmia liata hiehâna hmi cha rei leipa ta na pakah tawhta reikah pasa kawpa eikha chhao hmahta thei beih hra va na.

Ei Nà, nàma hawhpa saw nahzy nata vahpa zy cháta á pie khai hapa, Chanô siapa  nata areisipa châ awpa he eikho chaipa châ ta, châ cheingei awpa chhao ei chhuah aw. Kyh miah na pachâpa vàta nie nata do Kyh liata nàma apaky lymá tyh chi ta; keimo vâta chysia phapa, na viasa richâhzy hawhta na hnei thei leipa chhaota reipasipasuana na hneipa pahno beih va na.

Ei Nà, Na palóh a châ leina zieta O chhôh liata tymâna avaw tlôpa chhaota eikha hmahta na paphôpalyuhpa thei beih hra va na.

EI NÂ, Sawchanô pakha deita na hnei chi ta, nô nata sawchanô  kyh âpacha kawpazy hawhta bielóhawhpa  reih khohna daihti zy chhao nâ ngiabâh kaw tyh hra aw ta tyh?!

EI NÂ, na kiahpâ, làhnia liata ei y nota, sawchanô zy ta nô kyh pachâna ama palâsa tyhpa ei palâsa thei leipa nata, nâma châta ei tao hialia awpa ei tao leipa zydua ei pachâ chàhta la ei ngiapachhi hleikhô ta ei palóh a pasa kaw. Keima châta thlah khâ na chhâ tyhpazy my tiaràh va na lah y! Kei chhao nâma châta thlah khâ ei vaw chhà lymâ aw. Abeipa ta miah ngiachhie sala tlàhboh kawpa ta hmia eimà hmô heih n'awpa daihti ângiatiah râita ângiatiah va na.

EI NÂ, Keima châta ato châ chi ta, na kyhpachàna aozy kha myna no rai hnei va na.

EI NÂ, KYH EI PACHÂ CHAIPA.