COVID-19 : Dawh 24 chhôhta India liata hri kiahpa hmô chhipa 13,586 + khizaw duasu

1. India liata Chutyhnoh taihta 'coronavirus' a kiahpa zydua zie cha chyhsa 3,80,532 tloh ha ei ta, dawh 24 a khô hapa chhôhta chyhsa 13,586 hri kiahpa hmô chhipa ama châ, tahpa Union Ministry of Health and Family Welfare chata ama palâsa. He he nohkha chhôhta India liata hri kiahpa ama hmôpapua hluh chaina a châ. He hawhta a châ nota Covid-19 vâta Chutyhnoh taihta chyhsa 12,573 ama thi ha.

2. Centre sawhkhâ chata India khihpi Delhi liata Private Hospital liata Covid-19 vâta tlâhleipazy a mohôhna mâ cha bitai ta. Home Minister Amit Shah hmahlana ry liata Committee paduapa chata tlâhleipa sopa-eihna liata mohôhpazy cha mopakha ta Rs 8,000 tawhta Rs 10,000 taihta cheih aw ei ta, ICU liata Ventilator a hlao leipa ta mohôhpazy ta Rs 13,000 tawhta Rs 15,000 taihta cheih aw ei ta, ICU liata ventilator chhaota mohôhpazy cha Rs 15,000 tawhta Rs 18,000 taihta cheih awpa ta bitaipa ama châ.

3. Tamil Nadu liata Covid-19 chahra viana District 4-zy liata Chhiepa noh 30 taihta akhawhlôhna (Total Lockdown) siekhei pathaopa a châ. Chennai, Chengalpet, Kancheepuram nata Thiruvallur District zy he Covid-19 hri chahrana su zy ama châ.

4. World Health Organization (WHO) chief scientist Soumya Swaminathan chata Covid-19 thohna cha atakô kôchhâna lâta taopapua hmâ awpa hnabeiseih â chhih kaw, a ta.

5. Jammu and Kashmir sawhkhâ chata Pohbienoh khata Covid-19 hri vâta a thipa chyhsa pakha ri ama rao nota a chhôhkha hryta pano, eikhapi ta pao ei ta, ama thina kyh cha alaichadai awpa ta hmah a la.

6. WHO ta Malaria thohna 'Hydrochloroquin' cha Covid-19 hri ohpazy mohôhna tlâh châ vei, tahpa a phuah tawhta India râh liata he thohna hmâpa mopachhina mohôhna siekhei haina su 22 zy cha chalihsapa a châ.

7. United States health expert Anthony Fauci chata râhchhôh liata akhawhlôhna pachyu viapa tlyma, a ô pakawh viapa tlyma siekheipa cha a ngiah hlei vei tahpa ta, “Akhawhlôhna kyh he la eima reipahmaih khao na ta pangiasa vana, râhchhôh liata Covid-19 chahra viana su zy he kohkina dâh tlao pachâpahmaoh sihla a pha via aw.”a ta.

8. Chutyhnoh taihta khizaw pôhpalôhpa liata Covid-19 hri kiahpa zydua zie cha maluh 8,491,673 châ hai ei ta, he hryta maluh 454,023 ama thi ha, tahpa Johns Hopkins University ta palâsa ta. Maluh 4,157,838 tlai tlâh ha hra ei ta, a tlãhpa zie he 50% ama tloh ha.