INDIA : Covid-19 hri kiahpa zie thysy 3 (lakh) hlâta ama hluh via ha bâ!

Dawh 24 a khô hapa chhôhta India liata Coronavirus a kiahpa hmôpapua chhipa chyhsa zie 11,458 y heihpa ta, hetana heta India liata Covid-19 hri kiahpa zydua zie cha thysy 3 (lakh) hlâta ama hluh via ha bâ.

Covid-19 hri liahpa hmôpapua chhipa chyhsa 11,458 chhaota Covid-19 hri a liah hapa zydua cha 308,993 ama châ ha.

Union Health Ministry, India ta a palâsana liata dawh 24 a khô hapa chhôh pyly khata India chyhsa 386 cha Covid-19 vâta thi via heihpa ta, hetana heta India chyhsa 8,884 cha Covid-19 vâta ama thi ha hra.

He hawhta a châ nona heta, atahmâ duasu liata hri a oh haipa (Active cases) deikua 145,779 y hai ei ta, a tlâhpapua hapa 154,330 ama y ha hra.