Donald Trump châta kâhvileipa ta thlah a chhâna liata India paw pakha a thi

India paw pakha, Donald Trump pasâhsa kawtuhpa, Bussa Krishna Raju, lyutaopa cha United States President Donald Trump ta Covid-19 hri a kiah, tahpa a pahno tawhna rakha khata, zâ chhao a mô phathi leipa ta nata, pati chhao a phathipa ta nie leipa ta Covid-19 tawhta Trump a tlâh theina awpa ta thlahchhâ tyh ta. He hawhta Trump châta â hlâ khai nona heta vâduachhih kawpa ta Abeipanoh khata châh-ao a chalihpa ta a thi, tahpa AFP chata a palâsa.

A viasanahzy ta ama reina dâhta cha, Raju he Trump ta Covid-19 hri a kiah, tahpa a pahnopa khata pahlaw kaw ta. 

Ano he US President Trump pasâhsa ngâsâtuhpa a chá hra. A viasa pha kawpa pakha ta a reina liata cha "Raju heta zâkô khata United States President Donald Trump nohthlahvipa (Statue) feet 6-ta a sâhpa paduapa ta, â chhy tyh."

"Trump ta COVID-19 hri a kiah tahpa a pahnopa chata athata pahlaw ta. A zo chhao a mô phathi khao leipa ta, kâhvileipa ta US President Trump a tlâh theina awpa ta noh 3/4 chhôh cha thlah a chhâ. Abeipanoh zâlâ khata châh-ao a chalihpa ta a thi hapa a châ." a ta.