France liata a tlahnaona rarô-ypa liata chyhsa 3 ama thi!

Pohbienohta France khihpi miakha, Nice khihpi achhyna-O miakha liata chaihzô hmâpa ta chyhsa pathôh (chapaw 1 nata chanô 2) thietuhpa cha atliata liata Tunisia tawhta France lá a vaw siepa a châ, tahpa Police zy ta ama rei.

He chyhsa, kô 21-pa, heta Italian Red Cross châ hnei ta, he a châ hmâpa heta balyhta thla hmiatuapa liana khata Italy liata liahpahlô Lampedusa a vaw ngiapa a châ. He Achhyna-O a tlahnaona liana heta Police zy ta meithei ta ka ei ta, a duasu pha tu vei.

Pohbienohta Nice khihpa liata Achhyna-O miakha Notre-Dame basilica liata he moleipa ta chaihzô ta a tlahnaopa nô pakha chhochhi he cha a luh â tai pachhô daihmâ. France President Emmanuel Macron chata he hmo tlôpa he "Islamist riahrupa (terrorist) zy ta miah tlahnaona a châ" a ta. Macron chata France râh su nano nanopa liata zawpi ahmaosiahna su - Achhyna-O nata Siku zy liata pheisaih 3,000 soh tyhpa cha 7,000 lâta ama papôh tahpa reih ta. He hmo tlôpa vâna heta France sawhkhâ chata ahrohruana a pasâh via ha heih hra.

Pohbienohta Nice liata hmo tlôpa heta Thlarâh liata Paris Maw-notla lâta hmo tlôpa kha palôh liata vaw pathiehsa heih ta. Pachutuhpa pakha, Samuel Paty, cha a siku hawtipa hnihta Muslim zyhna hmôpapuatuhpa Prophet Muhammad nohthlahpa (cartoon) a pamosapa vâta a luh taipa a vaw châ ha heihpa kha a châ.

Kha hmo tlôpa khata Muslim nah ru pachhô kaw ta; he hawhta a châ nona heta France President Macron deikua ta cha Prophet Muhammed nohthlahpa (Cartoon)-ta taopa cha zyhna reipachhiena châ leipa ta, mopakha ta a khopa reihpapua/palâsa awpa khotalaina a hneipa palâsana a châ, a ta.

Nice achhyna-O tlahnaotuhpa heta chaihzô ta chyhsa a tlahnao nona heta "Allahu Akbar" (khazohpa cha a rônah chai) tahpa awh ta, he a awh nona heta ama vaw ka hapa a châ. 

He chyhsa ku tawhna heta Muslim zyhna châbu Koran, Telephone 2 nata chaihzô 30cm (12-inch) ta seihpa 2 hmôpa a châ.

Police zy chata he moleipa he Brahim Aouissaoui a châ, tahpa ama reih hra.

NICE KHIHPI LIATA A THIPAZY HE AHYZY MAW?

Pohbienohta apakhyna a y hlâta liata chaihzô ta tlahnaona vâta hrona a pahleipa 3 zy he achhyna-O chhôh liata a ypa sai châ ei ta. Achhyna-O chhôh liana heta pano : Kô 60-pa chanô, ano he a luh â tai pachhô daihmâ ta; pakha viapa he chapaw, kô 55-pa, a rao cha-âpa a châ hra. He chapaw viapa he achhyna-O mohôhtuhpa, lahpi nata saw pano a hnei haipa a châ. 

Hrona a pahleipa hryta 3-na he chanô châ ta, kô 44-pa, châ ta, moleipa heta chaihzô ta ei hluhpi vieh ta, a hmah chhaota achhyna-o tawhta a kiahta liata thopi daoh lâ â kei râ taraw ta, a hrona deikua pachha thei khao hra vei.

- BBC