Phone tawhta chyhsa dôvei tyhpa Nigeria chyhsa nata chanô pakha patu

Bhopal cyber cell police chata Nigerian chapaw pakha nata â pakaohpa, India chanô pakha, Mizo moh a phaohpa zy cha chyhsa ama dôvei tyhpa vâta ama patu. 

Henah pano he Hriaheihnoh khata Delhi liata ama patu, tahpa police chata ama rei. Henah pano he - Augustin Uidekwey (Nigeria chyhsa) nata  Lalhmunsiami tahpa ta pahnopa châ ei ta. Uidekwey he Nigeria chyhsa, kô 2015 tawhta India liata pahrâpa châ ta. India râj liata y theina, A Visa he a thi hapa hawhta reipa a châ. Police zy heta Nigeria Embassy ama pahnosa ha hra.

Chyhsa ama dôveina dâh : Liahsa amâ chupasia tawhta Social Media liata chyhsa, chanô nata chapaw zy cha viasa ta taopa ta, ama Phone nuhby hiah ei ta, ama phone nuhby ama hnei tawhna heta WhatsApp hmâpa ta a pakyh lymâ ei ta. Viasa ta â taopa ta liahsa amâ pangâsa tawhta, henah pano heta Phone tawhta bie a chhopa ta, US, UK tawhta hmopiepa (gift) paphao awpa hawhta amâ reih tyh.

He khai tawhna heta ama dôveipazy cha ama hmopiepa cha vaw tlô ha ta, 'customs duty' cheihpa ta ama la thei aw, ama tah heih. Phusâ cha ama Bank account liata khô awpa ta chho heih ei ta. Phusâ ama vaw khô tawhta, phie amâ chalihsai ha tyh. Atlâhpipa ta he hawhta ama dôvei tyhpazy heta Police tlôkhei awpa ngiaroh ha tyh ei ta. He vâna heta Police zy ta chhao ama patu thei tyh leipa a châ.

Chanô pakha deikua ta he hmo he Police lâ a pahnosapa vâta henah pano he ama patu thei hapa a châ.

Police zy ta ama reina liata cha henah pano he Delhi liata nôvah hawhta pahrâkhoh ei ta. Ama pano heta py 5 nata py 8 taih ngâlâh châ amâ chu.

- Free Press Journal