Covid-19 vâta mohôh haipa thyudyupa pakha thâtih ta chyhsa palôh a hria ngaita!

He chapaw thyudyupa he Py 10 (Class-X) achuhaipa châ ta. Vâduachhih kawpa ta, târi 29 Phiata, 2020 liana khata Covid 19 hri a kiah tahpa hmôpapuapa châ ta, he Covid-19 a kiah tahpa ama hmôpapua nona heta a pasana (symptom) chhao â lâpapua hra.

Covid-19 hri a oh tahpa pahnopa a châ patawnah heta biehneituhpa lâ tawhta he thyudyupa he District Headquarters Covid Care Centre (CCC) liata mohôh awpa ta ama vaw la pâ hra.

Ano he Class-X achuhaipa, a siku kiana liata sôh nata hmo a byuhpa anosasyh ta a tôh lymâpa, a bu sai awpa â ngiahpa zydua chhao siku amâ pahâ chhôhta chyhsa ry liata hria laihpa ta a hlao papua tyhpa châ ta. He hri a kiah tahpa ama hmô hlâta chhao heta Siku cha-yna (Holoday,) daihti cha ryhpaohna ta lala ta a School Uniform viahkao lalôhpa chaleina awpa tahpa ta O tôh khaoh chao awpa chhao liahsa â pahawh ha ta; châhrasala vâduachhih kawpa ta Covid 19 Positive vaw châ ha ta, a saduthliena zy cha meithâh hawh châ ha ta, a palôh rai pahâh khao vei.

Covid Care Centre lâ ngaikhei awpa a châ ha bâ, tahpa â pahno nona heta 'Châ chhao achu hluh hmâ tlôh leipa na ta, châ achuna daihti phapa ei hnei ha bâ chuh' tahpa ta tlao a palôh pachhyupa ta a chhuahnoh ta, chatanachata â chuna bu zy chhaota CCC a ngiapa ta, a pasana a zie-y viana daihti liana maihta châ â chu tyh.

He hawtipa he chhôhkha sipasa kawpa tawh tahpa châ ta, unawh pilâhpa pakha hnei ta, ano he a uhthei viapa a châ. A nô nata paw zy he a chhaih ha ei ta, ama pawsaw sahlaota khihsa ei ta, ama paw seihnaipa (a paw nawhta) tlâhleipa, akhaihly khao leipa, ano khota a piepâ thei khao leipa mohhôh ei ta, ama khihsa a riethei ngaita hra.

He hawhta chapaw thyudyupa, Py 10 achuhaipa, Covid 19 vâta mohhôh haipa ta a hmialâ daihti lia khâpa ma vaw tlô aw tahpa chhao pachâ pasih tu leipa ta hnabeiseihna a sâh kawpa hneina chôta pakhupa, chachôhna pasapa, chasipa nata chhôhpatlaipa hneina chôta chhao châ achupa hnôhchhyh khoh leipa ta â chu hnolopa he palôh hria ngaita ta, a thâtih a pahnopa maihta ama ngiachhie kaw sai.