US Atlyhna : Donald Trump ta White House a puasai thlâh ha bâ ma?

 US President atlyhna sie haipa liata, President a châ haipa, Donald Trump ta 'Supreme Court hnohta Vote rei haipa chalihsa chy awpa ta ei tlôkhei aw' a tah ngâna hryta, Democratic Joe Biden duasu pha via lymâpa lyu ta; he thâtih pachhuahpanoh hai no taihna heta cha Joe Biden heta Electoral College Vote 264 hmô ha ta; Trump ta 214 a hmô hai. Tloh awpa ta Electoral Vote 538 liata 270 hmô a ngiah ta, heta mopa ta cha Joe Biden he a duasu a pha via chypa a lyu.

Joe Biden chata, US President châ awpa ta a duasu a pha via tahpa cha a sia thlâh ha, tahpa ta, "Vote ama reih khai tita cha pahnietuhpa eima châ aw tahpa he eimâ ngiapâ," tahpa ta Michigan State liata pahniena to awpa hawhta saichhieliepa a châ tawhta a rei.

Atahmâ he atlyhna chhichâna pasiatuh awpa State 4 : Arizona, Georgia, Wisconsin nata Pennsylvania liata US President Atlyhna he â pahnieh ha bâ.

He hawhta a châ nota President a châ haipa Donald Trump he atlyh hlâta saichhieliena (Polls) zy hlâta a duasu pha via ta, State 23 - Texas, Ohio nata Florida, taihta a la khai ha hra. He heta saichhieliena (Polls) kha khachâ rakha ma cha a do vei, tahpa a palâsa kaw.

President Trump heta, pasiana (Evidence) chaluah hlei leipa ta atlyhna vote rei haipa liata hmo do leipa a y tahpa ta, Supreme Court tlôkhei â chhuah, tahpa reih ta. He he Biden pynah chata "hmo zo a chhih leipa, hiehâh pachhihsa", kawpa a châ tahpa ta : "Vote reina he chalihsa awpa châ vei" ama tah hra.

Atakô atlyhna he US Thâtih liata Vote tla hluh chaina a châ theipa vâta Vote tlapa zydua reih khai awpa heta Chutyhnoh taih â ô thlâh ha thei.