MIZORAM : Kô 2006-2020 chhôhta Malaria vâta chyhsa 595 ama thi

Mizoram liata kô 2006 tawhta zâkô kô 2020 taihna khata chasipa (malaria) vâta a thipa chyhsa 595 y ei ta, zâkô chhôh khata chyhsa 6 ama thi.

National vector borne diseases control programme (NVBDCP) liata a hriatuhpazy ta ama reina liata, zâkô 2020 chhôh khata thisaih mopasiapa chyhsa 2,77,834 tawhta malaria hmôpapuapa zie chyhsa 8,349 y ei ta, cha hryta chyhsa 6,811 zy cha Pf châpa ta, Pv case 1,538 y ei ta, chyhsa 6 ta ama thikhei.

Kô 2006-2020 chhôh malaria hluh chaina daihti cha kô 2006 châpa ta, he kô chhôh heta malaria thikheipa chyhsa 121 y ei ta, thisaih mopasiapa chyhsa 2,05,535 liata chyhsa 8,649 ta malaria ama hnei tahpa ama hmôpapua.

NVBSCP hriatuhpazy ta ama ngianazie liata cha malaria hneipa he kôchareihta a sâh hlei ta hmôpapuapa châ tyh hrasala, thikheipa deikua chyh via lymâ ei ta, kô 2006-liata a thikheipa 121 ama y nota, kô 2020-liata cha chyhsa 6 ngâlâhta ama thikhei.

Kô a khô hapa 2006-2020 chhôh zydua khata chyhsa thisaih mopasiapa 34,01,603 y ha ei ta, he tawhta malaria pasana a hneipa hmôpapuapa zydua zie cha 1,59,751 tloh ta, malaria pasana a hneipa zydua tawhta 80% cha PF ama châ hra.

 

-      ZALEN