India lyutaopazy châta hlasathaipa RIHANNA

 

Kô 32-ta uhtheipa, ‘Umbrella’ nata ‘Diamond’ tahpa hlazy vâta khizaw ta a pahnopa nata hlasathaipa a lâluah kawpa, Rihanna ta ‘Twitter’ siepahliepa ta India râh liata lytaopazy kyh a reipa chata Internet khizaw a charao pahnie kaw. Rihanna he Caribbean liahpahlô liata râh miakha Barbados ti nata râh chyhsa châ ta, kô 2003 tawhna khata United State liata a pahrâ hapa a châ.

Rihanna heta Hriaheihnoh khata Delhi râhri liata palôhtlâhleina palâsapa ta India sawhkhâ dâh taopa ‘Farm Law’ adyuh haituhpa, Lyutaopazy rairuna nata riethei ama taona cha ‘Khâpa vâta ma pahno a hlao vei? Khazia ma pahnolei eimâ pachâ?’ tahpa ta Twitter liata tawhpapua ta. Haryana nata a chheipâh liata palôhtlâhleina palâsa haituhpa lyutaopazy ta ama thâtih hiezawhna awpa ta chhaichhi ama hmâ chaipa, Internet pachhâsapa ta a ypa cha Rihanna heta a reih papua hra.

Ministry of Home Affairs chata Pakhynoh taihta pa-ôsa awpa ta lyutaopazy ahmaohna su - Singhu, Ghazipur nata Tikri liata Internet service-zy cha pachhâsa ta. He heta lyutaopazy palôhtlâhleina palâsapa cha khizaw hmiakô tawhta nyu awpa a chhuahpa ta hmahlana a palyusa kaw.