Myanmar : US ta Myanmar zawpi châta â duah lymâ aw a tah

Myanmar pheisaihzy chata Myanmar râh chhihtha haituhpa Aung San Suu Kyi nata a sawhkhâ liata chhihtuhpazy cha patupa ta, Myanmar sawhkhâ ama thy pathlah ha heih.

Myanmar râh liata biehneina zydua cha pheisaih luh chaipa ku liata sohpa châpa ta, kô 1 chhôh châta Myanmar râh liata ‘State of Emergency’ phuahpa a châpâ ha hra, tahpa Pheisaih biepuapa chata a palâsa.

He hawhta pheisaihta biehneina tlokhuh ama lapa he Myanmar atlyhna liata Suu Kyi Party National League for Democracy (NLD) ta pahniena â chieh kawpa ta ama to khai tawhta a tlôpa a châ.

Suu Kyi chata ano a châhtuhpazy cha Pheisaihzy a pielyuzie cha a pyh lei awpa ta a hawpa ta, palôhtlâhleina palâsa awpa ta bie a ta hra ei.

Suu Kyi heta ama patu hlâta châ a ropa liata, he pheisaih a pielyuzie heta Myanmar râh cha mopakha ryureina (Dictatorship) lâta a kuakhei ha heih, tahpa a reih hra.

Hriatuanoh myrâh khata Myanmar pheisaih biepuapa chat biehneina zydua cha pheisaih luhpa commander-in-chief Min Aung Hlaing ku liata hlâpaa châ, tahpa palâsapa ta, he hawhta amâ pielyuna chhâpa cha atlyhna a do leipa (election fraud) vâta a châ, ama tah. Pheisaihzy he, Nay Pyi Taw khihpi nata, Yangon khihpi liata ama y pathao ha hra.

Myanmar, Burma tahpa ta pahno hrapa he kô 2011 taihna khata pheisaih ryureina ry liata vaw y lymâ ta, kô 2011 atlyhna liata deikua Aung Sann Suu Kyi chhihthapa NLD ta pahniena topa ta, pheisaih ta pakhâpadiena y leipa ta ryu ama rei tyhna (direct military rule)kha a vaw pachhâsa hapa a châ.

US-ta khâpa a reih?

United States chata thlaita Myanmar pheisaih apielyuzie he maochhiepa ta, US chata “Myanmar liata zawpi ryureina a y theina awpa ta atlyhna liata pahniena a totuhpazy chôta pheisaih apielyuzie cha mopakhô chakhyh aw vei" tah ta.

US Secretary of State Antony Blinken chata Myanmar sawhkhâ cha sawhkhâ chhihtuhpa ama patupa zydua nata, râh nôpawpa ama patupa zydua cha papua khai awpa ta tahpa ta, US "cha Burma zawpi ta zawpi ryureina, khotalaina, aryhna nata hmahsiena ama hnei theina awpa ta khâchâ ama chhâh â châh aw” tahpa ta, "Pheisaihzy cha ama hmotaopa a chatliena lâta phie pakhua awpa ta” ama tah hra.

- BBC