Aung San Suu Kyi : A hrochhôh Lô-O liata a tâh thei awpa duasu liata â duah hai

Târi 1 Hmypi, 2021 liata Myanmar pheisaihzy ta ama patu tawhta a ei khana awpa ta Myanmar zawpi sawhkhâ paduatuhpa nata, NLD luhpa Aung San Suu Kyi cha Court liata ano pôhpa tlai a luahpa ta, a chôta biebuapa pa-aopazy ama pachia nota a chôta ryureina a hmiachhy.

Myanmar khihpi Naypyitaw liata Special Court liata a chôchâh ama pachia no he a châta a duahpa, dâhpahnopa sahlao (Legal team)-hluh viapazy ta amâ châhkheipa ama râh luhpa hmi ama hmô tua chaina tah thei awpa a châ hra. United Nations chata Suu Kyi chô liata biebuapa ama pa-aopazy cha Myanmar pheisaihzy ta Politics vâta ama taopa sai tahpa ta vaw reih ha ta. He hawhpa biebuapa taochhyhpa hmâpa heta Myanmar râh chhihtuhpa hluh viapazy ta patâhpa ama châ hai hra.

Court liata a chôchâh pachiana a hmiachhy hlâna heta minute 30-chhôh dâhpahnopazy apakyhpa ta, Suu Kyi he a hmiaphaozie nata â lâna dâh liata a hnatlâna a pha hmi kaw. 

Ano châta aduahpa dâhpahnopazy heta Suu Kyi cha a Party - National League for Democracy (NLD) Pheisaih sawhkhâ ta ama baina zydua tawhta khâchâ pabohsa a chhuah ta, amâ dona chhao khâchâ palâsa awpa â chhuahzie ama rei.

Dâhpahnopa hryta pakha, Min Min Soe chata, “Daw Aung San Suu Kyi chata NLD cha Zawpi sawhkhâ châ ta, zawpi ama y chhôhta la â duah aw, a tah" tahpa ta a rei.

Suu Kyi heta ama râh, Myanmar liata zawpi sawhkhâ â duah theina awpa ta athata a vaw teina kyh liata, kô 20 chhôh cha patâhpa/hraihpa vaw châ ha tyh ta, atahmâ ta biebuapa liana chhao heta Pheisaih sawhkhâ heta dâh leipa ta 'walkie-talkies' lapangiapa biebuapazy, Covid-19 Potlana hri hryta dâh nata phôh paraona biebuapazy nata Official Secrets Act paraopa/chakhiapa hawhtazy baipa châ ta. He hleikhôna heta Pheisaih sawhkhâ heta Suu Kyi he phusâ, a sykhao ta daopa hawhta nata ngôh, Pound 25 ta a hripa a daopa hawhta bai ei ta, henahzy deikua he cha biebuapa pitlohpa hawhta siekhei veih ei.

He biebuapa ama pa-aopa zydua liata thailei pachâsapa a châ khiahta cha kô 75 ta uhtheipa — Suu Kyi, he a hrochhôhta lô-O liata patâh thei awpa duasu liata â duah hai.

Suu Kyi he ama patu thaoh nona khata a pahrâna su, Naypyitaw liata hraihpa a châ tarawpa ta, su hro lâ, a yna chybia pahno leina su liata a mo chahrypa ta pasiepa a châ tahpa dâhpahnopazy heta ama reih.

Min Min Soe chata, "Atahmâ ta ama sona su he pahno vei tahpa reih ta,” tahpa ta, “Khôtho lâta hmô tlôpa pahno tlâ hra vei.”a tah.

Târi 7 Chhiepa, 2021 heta Suu Kyi he Court liata â duah heih aw.