COVID-19 : US President Biden-ta Covid-19 a vaw thaotôna su alaichadai awpa ta biepiepa a papua - China pachâdâh châ vei!

China khihpi miakha, Wuhan khihpi liata Covid-19 hri ama hmôpapua tawhta kô 1 nata â khophie rachhôh tlai vaw sie ha heih ta, he VIRUS â vaw thaotôna, a vaw y Pathaona dâh deikua atanoh taihta pahno theipa châ mâh leipa ta, noraih kawpa ta khizaw Scientist-zy chhao ta pangiasapa hleikhô rei n'awpa hnei mâh veih ei.

He hawhta a châ nona heta, chyhsa hluhpi ta bie hmeiseihpa hawhta ama pachâ leipa, he hri, Virus he China liata Laboratory miakha tawhta a kaw hiezawhpa hawhta pangiasana, pachâna 'Conspiracy Theory' cha atlia tawhta pathiehpahlâh heihpa châpa ta, khizaw ta he he a buakhei pathao hai heih.

He hawhta he pangiasana, he Virus he China Laboratory tawhta a hiezawhpa na a châ tahpa pangiasana a vaw y pathao ha heihpa he, atliata US President Joe Biden ta Coronavirus a vaw thaotôna alaichadai awpa ta bie a papuapa vâta a châ.

He Coronavirus he ama hmô tua chaina su, Chinese khihpi miakha, Wuhan liata Laboratory tawhta â hiezawhpa na a châ aw, tahpa ta pangiasana chata khizaw nah a charao pathao ha heih.

He pangiasana a pyhtuhpazy ta cha Wuhan liata Virus achuna supipa, 'Wuhan Institute of Virology (WIV)' lâta thlai a heih pâ ha heih ei ta; ama pangiasana pa-ipacha via heihtuhpa cha he Wuhan Laboratory liana heta kô 10 hlei chhôh tlai Lôkâhtâbaläpa liata 'Coronavirus' achupasiana ama vaw siekhei hapa he a châ.

Ama pangiasana papôhsa via awpa ta, he Laboratory he Wuhan liata hri ama hmôpapua tua chaina su, Huanan Daohpipa tawhta km chyhta liata a ypa châ pâ lao ta. He vâna heta, he pangiasana a pyhtuhpazy heta, he Laboratory tawhna heta Virus he zâpapuapa ta, Huanan Daohpipa (Market) lâ â hiezawh hapa a châ aw, ama tah.

He pangiasana he zâkô ta Covid-19 â vaw thao tua no tawhna khata vaw y ha ta, kha nota US President Donald Trump kha he pangiasana a vaw duakheituhpa hmiatuapa a châ hra. Chyhsa thokha chhochhi ta cha he Coronavirus he China ta adyuhna chhaichhi châta khizaw thaina hmâpa ta pananopa ta, a TAOPAPUAPA na a châ, ama tah ngâkaw heih hra.

Kha nona khata chyhsa thokha nata Media thokhazy ta kha pachâna kha 'Conspiracy Theory' hawhta reih ei ta. Chatana chôta, a châ theina awpa kao a y thei tahpa ta saituhpa hluhpi vaw pua lymâ ei ta. US President Biden-ta chhao alaichadai awpa ta bie a papua ha heih hra.

He hawhta US ta Coronavirus a vaw thaotôna su alaichadai awpa ta bie a papua heihna chhâpa he atlia tawhta US Media zy ta Coronavirus kyh liata Laboratory tawhta a pua theina kyh ama reih pathao ha heihpa vâta châ ta. He hleikhôta Scientist thokha ta a chakhiecharieh kawpa ta he VIRUS kyh liata hmo pahno awpa ta achuna ama siekhei heihpa vâta châ ta. US Intelligence-ta âchupasiana ama hneipa liata chhochhi cha, he pasana zawpi lâta â hiezawh hlâ, Phiapi thla, 2019 liana khata Wuhan laboratory liata a hriapa chyhsa 3-zy cha he hri vâna heta thohna-O liata mohôhpa ama vaw châ hapa hawhta reipa a châ..

Châhrasala US Atlyhna vaw y ta, Donald Trump tla ta, Joe Biden a tloh patawnah khata, Trump ta Coronavirus kyh liata Wuhan Laboratory tawhta a vaw thaotôpa a châ nata châ lei alaichadaina siekhei awpa ta a vaw pathaopatôpa cha chalihsapa kha châ ta. Biden a vaw sawhkhâ tawhta nata, Covid-19 ta US liahsa a chanaoh tawhta, târi 11 Patô, 2021 liana khata Anthony Fauci, President Biden Chief medical adviser chata US senate committee hnohta, "Wuhan Laboratory tawhta he hri he a thaopa na a châ tahpa pangiasana kha hmo a châ theipa châ ta, alaichadaina siekhei awpa he tlokhuh ei pyh," a tah ha heihpa vâta, President Biden heta atahmâ cha he Virus a vaw thaotôna he alaichadai pathi ta, noh 90 chhôhta ama hmo hmôpapuapa Report pangia awpa ta US Intelligence Agency zy cha a pahnosa ha heihpa ei a châ.

He hawhta Coronavirus kyh liata pangiasana a ypa he zâkô lâ tawhna khata rei hlao kaw ta. He kyh alaichadaituhpa, World Health Organization (WHO) hmo hmôpapuapa hra khata Achhyna hlâta hiahrihna pahluhsa via lao ta. 

Atakô 2021 kô thaona lâchhâh khata WHO-heta Wuhan liata hri a vaw thaona achupasia ta, alaichadai awpa ta Scientist â tlyhpazy cha vaw tuah ha ta. He Scientist-zy heta noh 12 chhôh Wuhan liata daihti kei hmâhpa ta, Laboratory chhao kei tly tlai ei ta, Wuhan Laboratory tawhta hri a thaotôpa hawhta pangiasana cha 'a châ thei na ta pangiasa a chhih vei' ama vaw tah hapa kha a châ.

Châhrasala WHO ta Scientist a tuapazy hmo hmôpapuapa he chyhsa hluhpi ta zo leipa ei ta. Scientist thokha chhochhi ta cha WHO heta Wuhan Laboratory tawhta Covid-19 he â vaw thaotô thei thlyu na, tahpa pangiasana cha zo hmeiseih leipa ta, pachâ peimawh hra vei, tahpa ta ama bai.

He Virus he Wuhan Laboratory tawhta â vaw thaotôpa a châ thei aw, tahpa cha pachâ peimawhpa ta, a sia viapa ta alaichadai awpa a khohpa vaw pua via lymâ ei ta.

WHO Director-general, Dr Tedros Adhanom Ghebreyesus, taihta chhao alaichadai pathi awpa ta a khona reihkah papuapa ta : "He pangiasana zydua he achupasia via awpa â ngiah."a tah hra.

He hawhta Wuhan Laboratory tawhta Covid-19 he â thaotôpa, a zâpapuapa a châ thei aw, tahpa pangiasana lai via lymâ heihpa ta, alaichadai via awpa taihta bie a y pathao ha heihpa he China chata 'Hmia a pachhiena na a châ' tahpa ta, he hri he Niebaw lapangiana kao tawhta a vaw ngiapa a châ aw, ama vaw tah ha heih hra.

US President Joe Biden-ta Wuhan Laboratory tawhta Covid-19 he a zâpapuapa a châ nata châ lei alaichadai pathi ta, noh 90 chhôhta Report pangia awpa ta US Intelligence Agency zy bie a piepa heta, US nata China likah ziza pasah via aw ta; he liata ama hmo hmôpapuapa chhichâna heta khizaw hmialâ daihti khachâ rakha ma cha a palâsa hmi kaw.

Khizaw ta nah a pachôh hai.