Israel nata Hamas ta akachaheihna (Ceasefire) hnei awpa ama paryhsa

Noh 11 chhôh tlai amâ tlahnao tawhta nata, hrona vâro tlai pahleipa a châ tawhta, Israel chata Hamas ama tlahnaona cha a chalihsai chy awpa paryhsapa ta, 'akachaheihna (Ceasefire)' hnei awpa cha ama paryhsa haw. Palestine riahrupa py, Gaza liata ryureina a chaba haituhpa Hamas-zy nahta amâ tlahnaopa vâna heta hiakha lâ rairiezy Nohto khihsana liata rairuna athata a tlôkhei hapa a châ.

Israel Prime Minister Benjamin Netanyahu cha Pohbienoh zâ rei lâta Security Cabinet-zy nahta amâ tyupahmaoh tawhta Hamas nahta amâ tlahnaona cha a chalihsai chy awpa ama paryhsa ha, tahpa phuah ta. Media thokha palâsana liata he hawhta akachaheihna hnei awpa ama paryhsana he Egypt lâ tawhta aryhna biereituh awpa ta vyuhtuapa pahruana hawhta a chânazie reipa châ ta, khati tawhta ma akachaheihna he hnei pathao awpa tahpa deikua biesiapa y vei.

Israel liata Senior Defense official lâ, Military Chief of Staff nata National Security Adviser-zy ta aryhna tluatuhpazy pahruana cha a pyh awpa ama tahpa vâta nata, Hamas ama tlahnaona liata Hlaotlohna pha kawpa ama to hapazy saipa ta akachaheihna cha amâ pyh hapa hawhta reipa a châ.

Israel Defense Minister Benny Gantz chata Twitter liata : “Adyuhna tlyliah liata hmo yzie hmeiseihpa ta hmialâ daihti a pasia aw."a tah.

He hawhta a châ nota, Security Cabinet pakha ta a reinazie ta cha, he akachaheihna he Chytyhnoh my dawh 2:00-pa tawhta hmâ pathaopa a châ aw, a tah.

He hawhta a châ nona heta, Hamas biepuapa chata he hawhta Israel ta akachaheihna hnei awpa a paryhsa hapa cha, "Netanyahu cha pahniepa ta a y haw, Palestine zawpi ta pahniena eima to.”tahpa ta pyury ama vaw hnei hai hra.

Israel nata Palestine atlahnaona liana heta Palestine chyhsa 230 hlei thi ei ta; Israel lâ he 12 ama thipa hawhta reipa châ ta; chyhsa 1000 hleita hmah ama phaoh hra.

Israel chata, he akachaheihna dâh nata phôh paraonazie ta Hamas amâ pielyu rai khiahta la, chado aw ma pi, ama tah.