Thapi phiapa ta Palestinian he eima tlahnao pazao lymâ aw - Benjamin Netanyahu, Israel PM

Israel Prime Minister Benjamin Netanyahu chata Gaza liata Palestinian riahrupa py Hamas ama tlahnaopa cha 'Thapi phiapa ta ama tlahnao pazao lymâ aw', a tah.

Video :

PM Netanyahu chata "Ziza a dia theina awpa ta a byuhna nata â ngiahnazie lymâ hawhta eimâ pielyu lymâ aw...Atahmâ chhao eimâ pielyu hai..daihti deikua a ryu chy aw," a tah hra.

Gaza official-zy cha Israel ta zawtheina tawhta Gaza a tlahnao hnôh chaipa liata chanô 16 nata hawtipa 10 a hlaopa ta chyhsa 42 ama thi heih, ama tah.

He hawhta a châ nona heta, Gaza lâ tawhta meithothu (Rocket)ta Israel ama tlahnaona liata, HRIATUANOH tawhta Abeipanoh taihna khata Israel chyhsa 10 ama thi hapa hawhta Israel ta a palâsa.

He thâtih pachhuahpanoh hai no taihna heta Gaza liata hawtipa 58 nata chanô 34 a hlaopa ta chyhsa 197 ama thi hapa hawhta reipa châ ta, he hawhta a châ nota chyhsa 1,235 ta hmah ama phaohpa hawhta Hamas ry liata a ypa health ministry chata palâsa ta. Israel chata athipa hry liana heta Hamas Riahrupa amâ hlao hôlô ama tah.

He hawhta a châ nona heta UN Security Council chata rairâta Atyupahmaohna (emergency meeting), hneipa ta, Israel nata Palestinian likah buana aryhna tao awpa ta vyuhtuapazy (Mediators) zy ta he Israel nata Palestine zy likah liata akachaheihna (Ceasefire) ama pa-ysa thei mawh na, tahpa ta ama hnabeiseihna a sâh kaw ta.

UN Secretary General Antonio Guterres chata Israel nata Palestine likah ziza cha thlaita padia para awpa â ngiahnazie he Atyupahmaohna liana heta a rei heih.