Afghanistan : Airport tlahnaona liata US Pheisaih 13 nata Afghan chyhsa 60 ama thi

Zâhnia (Pohbienoh) zâ ta Afghanistan khihpi Kabul Airport khôtho liata Bomb-papa vâta a thipa zie cha pahno thei hapa châpa ta - US Pheisaih 13 thipa ta, Afghan chyhsa 60 ama thi, tahpa sawhkhâ biepuapa ta a palâsa.

He Kabul Airport tlahnaona liata US Pheisaih a thipa zie he August, 2011 liata US Pheisaih Helicopter, Taliban-zy ta ama ka pathlahpa vâta Pheisaih 30 thina a tlô tawhta, Pheisaih ama thi hluh heih chaina a châpa hawhta US Pheisaih supipa, Pentagon chata a phuah. He hawhta Bomb ta tlahnaopa ama châ tarawpa heta, US Marine Corps General Kenneth McKenzie Jr, Commander, US Central Command, chata US chata Afghanistan liata a mo nata sa a ypa zydua nata Afghan chyhsa, châ peimawhpa a hneipa maih, a hluh thei chaina hawhta ama palypapua lymâ awpazie a rei. He Bomb papatuhpazy he Muslim riahrupa py ISIS (ISIL), Afghanistan liatahpazy ama châpa ta reipa châ ta, âmo he 'Islamic State in Khorasan Province, ISKP (ISIS-K)' tahpa ta pahnopa ama châ.