MARA NOVEL : PHURIE - BO 1-NA

 

ROHTUHPA BIEHMIA

A vaw ru tlai na! Phôhpa (Short story, Fiction, Novel etc) rohtuhpazy ei pasâhsana a pôh via rili ngâkaw! PHURIE phôhpa he roh awpa ei chhuahna nata, ei chhuahnoh chhôh a rei chaimâh..châhrasala, phôhpa ropa he nota vaw châ vei! Ei khazie tlaima roh a chhuahpa ta ei châhti ei chapai liahsa tawhta ei phie heih tyh tly?tahpa chhao pahno tiah khao hra vana. Châhrasala, leithei leina vâta châsôh patupa ta, ei roh hnolo thei lymâ ha tawhta tly cha, atahmâ cha bie kha sapa lâta â vaw lie ha hra, ei tah thei ha hra.

 

He châbu moh awpa châta liahsa ei vaw pahawh hapa, PHURIE tahpa he nôpaw ei ngâ viapa nata, Mara reih liata ei ngâ viapazy hnohta a yzie hiahrih lymâ heih na ta, châhrasala, ‘Mochaopa papangawh masiah chhopasiana’ dâh hawhna khata, ama pahnona dâh nata ama chhopasiana dâh avaw lyucho tlâ heih vei. ‘Unawh phôhpa reipa hmahta â lyu leipa cha ma’ tahpa ta lôhtlâh a paohpa ta liahsa PHURIE tahpa ama vaw hmâna zy nata, hlabie liata ama vaw hmâna dâhzy ei theina rakhata ei laichadai tawhta, PHURIE tahpa he, ‘MEITHEI PYU’ tahpa tlai a châpa ta ei pahno hapa vâta, he châbu moh nahta chhao â hmie kawpa ta pahno na ta, ei vaw hmâh hapa a châ. He châbu liahsa ei papua tawhta ‘PHURIE he Meithei pyu tahna châ vei’ nama vaw tah tlai heih khiahta la, leikhaoh ei chapao ha tahna tlâ vaw châ se!

Mara reihta châbu vâro tlai vaw pua ha ta. Châhrasala, phôhpa (Novel, Short Story) lâchhâh rona châbu deikua reikhi sakhi pua mâh vei. He vâna heta ei pachâna liata athata he hawhpa lâchhâh châbu he ahy chhâ heta ma cha vaw roh via ei sala aw!?ei za tah tyhpa a châ. Anodeikua, eima khona nata saduthlienazy he tlô khai thei tyh vei.

    “Kheitarai châ sala, rei a pha ma pha vei ma, phôhpa lâchhâh sâkhâ chhâ la roh hra tua rai sâ” tahpa ta ei pachâna cha za hmâh lilaw heih na ta. Anodeikua, ro ei vaw chhuahpa cha, avaw ru ngaita kaw..keimozy hawhpa roh awpa chi nata thai awpa chi chhao a châpa ta za pahno khao heih vana..keima liata athata tlohleina ei za hneipa ta a zâ hmô na ta..Vaw roh hapa châ sala, “Rei tlâh a châ ma?Chyhsa pahneizy ei pachhi tu tlamaw na aw?” tahpa ta china nata kâchhiena ta za bie heih na ta, keimasasyh ei eichhia ngâthlâh ha..

Achhâna lâta cha, “Kha he, a thai viapa nata a roh thai viapazy pahaona awpa raita, kei, a thai lei chaipa na heta vaw pathao tua rai sâ..Mara reih, he tlupo ta hmahsie ta, châbu pua hôlô bâ ta..phôhpa lâchhâh rona eima hnei chyh tu hapa he la pha vei” tahpa ta raipi hriapa hawhta ei vaw roh ha hrapa a châ. Khâpa ma a lyu sualuah vâ tly i?

He phôhpa he, hlâno daihti liata pasaihphazy apielyuna, a likah liata satlia nata laihsa a vâ-iana hryta adyuhna vaw puapa lâchhâh aheihpa, phichhyhpa (FICTION) châ ta. Hlâno Mara hla nata bie thokha cha a châna hawhta ei hmâh, tah leipa ta cha, Mara History liata hmo a vaw tlô hapa tlyma, chyhsa thâtih ama vaw ro hapa, ama moh pananopa ta rohpachhuahpa tlyma châ vei, tahpa deikua a reihtuhpazy ta rie eina pahnopa awpa ei chi ta ei châ haw hra ei. He hleikhôta, he phôhpa liata Chyhsa moh ei bipa zy he phichhyhpa nata taochhyhpa (FICTITIOUS CHARACTER) sai châ ta, a hroh thlâh hapazy moh nahta âvaw lyu tlamaw hapazy a châ khiahta cha, he phôhpa liata â châtuhpazy he phichhyhpa sai, alyuna tlyma azaokhina tlyma hnei vei, tahpa rie eina vaw pahnopa awpa ei chi ta ei châ haw hra ei. He phôhpa liata hmo a tlôpa nata, chyhsapa thâtih ei ropa zydua he, phichhyhpa nata taochhyhpa, phôhpa châta ei kaw padua chhyhpa sai châ ei ta; History atlychakapa ta ropa châ hra vei. He he areihtuhpazy ta nama pahnothai awpa ta ei châ haw hra ei.

Khatita ma la, Marapa hryta Novelist, phôhpa a roh thai patluapazy vaw pua aw ei ta; chatina chata, Mara Literature paw pakai via lymâ aw ta; Mara palôh tawhta a puapa, Mara kawpa ta ropa Phôhpa eima vaw hnei lymâ na ta khâchâ ei hnabei a seih.

He châbu ei roh chhôh zydua ta daothei kawpa ta khâ na deichhytuhpa ei chhôhkhazy hnohta alynabie reih na ta; Mara Literature laiseih n’awpa ta a daihti nata noh khâ vaw hmâh tyhtuhpa, Puhpa Lallungmuana Hrahu ta a daihti a cha-ie kawpa hryta, he châbu chhôh liata bie nata hla, pakhâta ta nata a chakhiehcharieh thei chaina hawhta na mohpasiapa ta, â dokyh leipazy eina padopa hleikhôta, pasyuna reikah pha kawpa zy eina hlâ tyhpa vâta, a chô liata palôh hmeiseihta alynabie rei leithei vana. 

He châbu ta nohkhaihpa a hmô thei n’awpa ta Mara reih nata Mara Literature abohna Opi, eima tha a chhâ awpa chi kawpa ta khâ miah deichhytuhpa, Publication Board, Art & Culture Department, MADC chô liata alynabie ei rei hmeiseih.

Kheitarai châ sala, he châbu, ‘PHURIE’ heta, Mara Literature pyury he, Meithei pyu hawhta pathâhsa via heih sala, a pyu parosa via heih sala, Mararâh nata Marapa yna kaoki to liata Marasawzy ta vaw theipa ta, Mara Literature ta pahniena HLADYUH a pathluah heih thei n’awpa ta, ‘PHURIE’ vaw châ thei tlai sala, ei tah kaw dia!

Châbu eima hmôna dâh tlyma, pachâdâh tlyma, arohtuhpa hnohta tlôkhei khohpa châta :

Whatsapp @ 7005806880   

Robert B.Syuhlô,

 

 

 

Prologue…..

Satlia, heta mopa ta satliapa hlâta paw hmi a phaoh viapa pakha he a paraparô kawpa heta siepâ, a râpâ tahpa heta abei-O yna, khih liahlôhpa lâta lytlâh kaw byuhpa lâna chata vaw ngai lymâ ta. A hmiaphaozie nata â paraparôna dâh tawhna chata bie peimawh kawpa, thlaita ama bei hnohta chhopâ ha awpa a hneipa a lyu kaw..

A vaw sie laihna lâthlôh â hlapâ hapa ma a châ ma, a mathlai chata a pôhpa pua dâ khai ha ta. Lâpaw tawhta chhochhi cha a pôhpa cha patliepâ khai sala na â ngia. A Meithei chhao cha a pia khao leipa ta a chaba ta vaw chaba laih ta. Khihliah liata â tyhpazy chhao chata cha hawhta â paraparô kawpa cha ama vaw mohpâ ngâkaw hra. Châhrasala ahy hmahta uasa leipa ta abei-O cha a pangaipâ lymâ ha.

 para hleikhôta a lâchakâ a chatlie kawpa vâna chata abei-O chhao cha thlai a kaw ngia para ta; ama khih bei, tlailai liata anodeita avaw hlaihlâ ngâpa chata satlia a vaw ngia ngâpa cha thlai vaw hmôpa ta, cha satlia tawhta bie a thei awpa pahno bâ awpa a byuh kawpa hawhna chata thlai ano chata vaw ngaipâ lymâ ta. Cha satlia chata liahsa a huhiahpazy a zie-y viana hâh tahpa ta ziza pathaihpa, khohlei-khoh kawpa ta a kaw sy liahsa tawhna chata, ama beipaw hnohna chata khâpa bie tlyma he a paraparô kawpa pyly heta kei chho ta. Satliapa ta bie a chhopa chata ama beipa cha a palysa kawpa ma a châ ha ma, a hmi liana chata palôhtlâhna nata, hmialâ daihti châta khâpa tlyma a hnabeiseihpa mopadei tlai he kaw phaoh ta; khâpa bie sualuah cha ma ama reih?tahpa deikua ahy hmahta pahno ei sala a ngia vei. Liahsa bie amâ chho khai tawhna chata ama bei chata chyhsa pakha he awpa ta, khâpa tlyma chho heih ta, cha chyhsa cha a paraparô kawpa ta pua lymâ ha heih hra ta.

Ama bei chata satlia, bieparu vaw chhotuhpa cha liahsa a duahpâpa ta, “Ei mahpaw ta a thi chyta bie eina tapa, ‘Na paw ta a tao ngâh leipa nata a tao khoh leipa cha vaw tao la, ei thlâ cha ama beinô luh nata ama khih laihsa chhithai chaipazy thisaih ta vaw chadô ma y. Ei hroh thlâh ha nota chhie nâ pie khoh leipa khih, kyhtotie liata keima châta chybâlâkhâ a châpa châ ei ta; na chado awpa châ vei’ a tahpa kha hlao eima patloh bâ aw. Asohsi kawpa nata ahrohrua kawpa ta sie aw ei chi ta…ama khih satlia, ama pasaihpha sahlaozy ta râh amâ khie ha awpa vâta deikua nama rai a naosia hmi kaw…mylâ myrâhta nama puapâ haw khaw” tahpa bie a reipa deikua cha pahnolei a pachâ thei’pa châ tlai vei; hmialâ daihti liata he khih beipa heta, khâpa hmo ma â chhuah?tahpa deikua pachâpadyna liata â zâ rie leithei vei………

Bo-I-Na

A kô nata a noh la pahno thei rimâh awpa châ khao tlai vei. Khihrâ khih, O dyh zakha hlei khih, khih aryhpa nata a ziza hiahza, aleilô nata râh chhao a pha kawpa khih cha kôhro zydua hlâta sâh liata amâ tivy via hapa vâta khih beipa nata a khihsawzy cha aly sahlao kaw ei ta, sâh hria khai ha ei ta, chasipaw ziza khô pathlah mâh leipa ta, nopi âvaw lie awpa ta âchhuahnoh lichih, Hmypi thla chhâna lâ châ ta. Khihsaw zydua châta cha-ypi nata kyhchhih rônahpa pachhuahpanoh n’awpa chôchâh pachiapa ta abei-O tlailai liana chata Khihhrâ bei nata bei machâzy cha Beihraih lai kawpa liata sahma baopa ta âvaw hmôpakhy ngâkaw ei ta.

Khihrâ khih he khih yna a ryh kawpa, tlâh laki liata khih â paryhpa, chariah châta chhao siehnao awpa rairupa, lôkâh kavo nata pâdawh kawpa a zi laih ta pangai awpa abyuhpa a châpa vâta chariah ku tawhta chhao â boh kawpa a châ. He hawhta a khih yna âryh kawpa vâna heta a khih chhao heta chariah ku a tao chyh kawpa a châ hra. A khihsawzy ama thlalôh ta, âly kaw ei ta, Khihrâ tlâhpi ziza phapa ry liata laizaolaopa ama châ hapa bao hnaihta a khihsawzy hmisâ chhao pha ta, ama chahra ngaita kaw hra. Abei machâ sahlao, khihtlâh mohôhna kyh liata ama bei ta a ngâ kawpa sahlao, â pahniehna chaipa, biebua hlabua paryhna kyh liata zy, hrâsie chariah teina daihti liata â saohiah chaipa sahlao nata, a khihpi dua ta lyu ama tla n’awpa pachâpahmaohpa ta pasopakâtuh chaipa sahlao-zy cha khihtlâh apahniehna, tah leithei awpa châ vei ei.

Abei Thalai chata, tlailai liata avaw hmaohpakhypa ta khihtlâh phana awpa pachâpahmaoh awpa ta a aw pakhypazy hnohna chata, “He eima pahno chyupa hawhta Hiahvâ palôh eima patlâh hapa cha ma a châ ma, Pachhâhpa khokheina eima dao hapa cha ma a châ ma? Kô hropa zydua hlâta sâh hria hluh pi ta, O tota tah thei awpa ta eimâ tivy kaw sai; Hiahvâ lôhtlâh leina tlôkhei hraoh leipa sala, chakâh hmahta vaw tlô tlamaw hapa châ sala, keimo khih he cha nodi panaopa ta y hraoh khao ma pi” tah ta. Abei machâzy chata â do tahpa ta ama luh vaw chhi ei ta.

Abei Thalai chata, “Atanoh ta he hawhta sâh liata eimâ tivyna chhâpa he ei machâzy lyutlana awpa su nata hmo namâ tlyh thaipa vâta nata ryrao nama thaina vâta tah leithei leipa na ta; cha hawhta a châ nota atakô cha he, eima khihsawzy aly kaw ei, ama hna ta zy tlâh pha kaw, tah ta, kheitarai châ sala, sâhhria daihtizy a chhâ liahsa ha tawhta cha a khihsaw châta kyhchhihna rônahpa eima pachhuahpanoh tua vâ, tahpa ta ei cha awpakhypa ei a châ. Hiahvâ ta maniah hrôhbie aw ta, atakô cha chakâh-chariah ta miah tlôthlu hraoh bao vei na tah tu. Kheita nama pachâ?” tahpa ta a machâ nah sahlao cha za moh ta.

Abei Machâ hry liata uhthei via chaipa, Lybei chata ama bei biereipa cha thlai ta kaw chyh-eihpa ta, “Eima beipa, Ngôthawpaw biereipa cha â do tlai. Kôpi kô kha chhôh thlaisâh baih lia hi leipa ta eima hriapasana chata Hiahvâ palôh apatlâh hapa nqwa a châ aw; kheitarai châ sala, khihsawzy amâ ly khiah khih aly ta, khihsawzy ama lôhrâh a tlô khiahta la khih lôhratlô a tahna châ ta; hnatlâhna nata vânoh apahawh lymâ sih la, sâhria daihti cha-y nona heta cha tlâ sa nata lao ta khihtlâh tlâ eima tô vâ?” kaw tah ta. Bei machâ hropazy chata ama luh vaw chhithlu lymâ hra ei ta. 

Bei machâ pakha chata, “Cha hawhta nâ, eima bei nata eima khih apahniehna chaipa nata eima paw miah châpatuhpa ta ryraona na tao hapa cha khihsawzy châta phana awpa tahpa sia thlâh hapa châ ta; a noh nata daihti rao sih la, O tota sahma beih abei tlyliah liata puakhei chyu awpa ta tlâh-awh khata vaw awh sala; châhvâ sâhria cha-ypi cha sahma a baopa ta, sa nata lao ta eimâ tô tua rai vâ. Atakô chhochhi cha sabai-sahawh chhao abei sawvâ liata â ngia pha kawpa ta pahnona ta, Hiahvâ palôhtlâh sala, khihsawzy palôhtlâh sala, eima beipaw chhao a hnatlâhna pasih lymâ sala, tahpa he eima khochaipa nata saduthlie chaipa na a châ tyh bao. Nâ eima khih nôpaw chaipa ta na khihsawzy phana awpa ta na pachâpa cha a pha bao tly” tahpa ta ama beipaw biereipa chhâh cha a kaw châh heih hra ta.

Abei Thalai chata, “He nâmo sahlao he kyhtotie liata na pasopakâ ta, na deichhy ta, taochheipa nata taopathleipa ta ryureina ei siekhei lei n’awpa ta khâ na chhosie tyhpa, khâ nâ tyu-dualâh tyhpa châ ei chi ta; eima khihsawzy phana awpa nata alyna awpa he ei pachâ chaipa a châ tyh, tahpa a pahnotuhpa sahlao nama châ. Kôhro hawhta atakô chhochhi cha chakâh-chariah lai hraoh leipa ta, thina-leina tlô hraoh hra vei. Kôpha kô tah leithei leipa na ta. Chariah-chakeih chipa vâta thlahzoh nôpona y hraoh leipa ta, hrichhiepa ta miah â kâsai ha hra ta; thapha kawpa ta châhvâ ziza phapa eima chahâ thlâh ha tua vâ, ei vaw tahpa a châ. Nâmo sahlao, kyhtotie liata ei charoh na vaihtuh chaipa nata ei ngiatlâh nâ châpatuhpazy ta âryh nama tah khiahta cha a rônah thei chaina hawhta eima tao u sy” tah ta, a machâ sahlao chata amâ pyh kaw, tahpa palâsana châta ama luh vaw chhi sahlao ei ta.

Machâ hryta bie nata hla a thaipa, biereipa hlâta hla ta a pachâna a phuah tyhpa ama tahpa, Khâbi cha kaw duahpa ta, “Kha he, sahma khata na vaw bao heih tua u. Hla vaw sa awpa ta dia eina vaw byuh kaw” tahpa ta beihraih liata sahma cha sypa ta, a sy khai tawhta “Abei rônahpa nata hneirôhpa pathla nata khihsaw châ ma pi mâ? Sôhthih puana hnawh tawhta vaw puapa châ ma pi mâ” tahpa ta a ao sia hrâlâ kawpa ta, kheitaru avihpa hawhta nah charao tlôpa hmâpa ta hla kaw sa ta, 

    “Khihrâ tlâhpi y y;

    Sangyu siena thisy siena,

     A zâ hno tlarua na e !”

tahpa ta kaw thyu ta, a bâh pakaipa ta tliatlâh liana chata a thyuthâ ta; bei machâ hropazy chhao a tyuh molo thei khao vei ei. Ama bâh hiesawpa ta amâ kaw duah phiephu khai ha bâ. Khâbi chata hlabie kaw pathluah heihpa ta, “Riahphapa, riahpaw nata machhyupa laina khih châ ma pi mâ? Sahrâh pahluahpa ta vei mâ nohchareih Meithei pyu eima parosa thlâh ha vei?

“Avaw hnei tu khaw khaw…

‘Eima khih la dialei khih ny,

 Meithei phu rie chie vei,

Khohtyh deina nohto ama tô’ ama tah vei mâ?”

tahpa ta tlailai â chalyu ngâna taihta atlaitlâpa ta, hla sa ei ta, ama pyury a pha ngaita kaw.

Abei Thalai chata cha hawhta a bei machâ sahlaozy bie nata hla pathluahpa ta, ama pielyu pathao hapa chata a tha papawh kaw ta; anodeikua a noh nata daihti dâhdei hmahta ama rao hlâta cha hawhta abei machâ sahlaozy amâ pielyu hapa cha a phapa ta pahno leipa ta, a bâh cha kaw pakai ta, a machâ sahlao, thathyu kawpa ta a teilyu ngâpazy lâna chata a bâ kei pazawhpa ta, “Ei thlalôhna nata ei saohiah chaipa tlâhpi saih u, kheitarai châ sala cha-ypi noh rônahpa châta atanohta eima hla nata biezy he rie â so chy ha ei sih la; he hawhta khihtlâh dua ta kyhchhihna hnei awpa eima châ ha tawhta cha lao ta miah a khichao kaw hrasala, sa ta miah â daih khao leipa ta a châ khiahta cha â su thai rimâ awpa châ tlôh leipa ta; eima pasaipha sa katheipazy râh eima pakhiesa ha tua vâ? Zôrih tlâh khi eima Meithei pyu dia kaw bâ ta, masiah-chaoliah ma chavyh-sakhih ma kyhchhi sa tô awpa ta eima kaw tlua tua vâ?” tah ta. Bei machâzy chata ama lâ ngâpa cha a chalihsaipa ta tlailai liata tyuhmo paryh sahlao ha heih ei ta.

Khâbi pyly chata ama bei biereipa cha kaw baichha heihpa ta, “Zôrih tlâh na vaw reihpa cha la ei palôh âvaw lie kaw na. Eima pasaipha sa ka theipazy ta he su liana heta sa to sazaw kapa ta ama tlaitlaona chaipa châ ta; Eima pasaipha sakatheipazy vâta eima khih chhao,

‘Khihrâ khih la dialei khih ny,

  Viahpa Meithei phu rie chie vei,

  Khohtyh deina nohto ma tô’

tahpa ta sa luh iapa ta Meithei pyu nata khoh pyu eima vaw parosa kôzaw tyh; kha hawhpa daihti hmâh heih thei awpa ta eima beipaw ta ‘Zôrihtlâh’ moh na vaw reihpapuapa cha la, lochono hawhta Meithei a pu ta, Zôrihtlâh lâ kiah heih awpa tlai na eina vaw pahla. Eima Meithei nata khoh pyu paro leina noh na avaw pasihpâ ha bâ. Eima beipaw reipa he ei pyh hmeiseih” kaw tah ta. Abei machâ hropazy chhao chata amâ pyhkhei kaw, tahpa palâsana awpa ta ama luh vaw chhi sahlao ei ta.

Chatanachata Zôrihtlâh lâta Cha-ypi noh rônahpa a hmâna awpa liata sa to sazaw pahluah awpa hry liata pahlao awpa tlua ta, phaoh awpa cha paryhsa ei ta. Zôrihtlâh lâta râh a khie n’awpa châta daihti pha chaipa, Pamih thlâpâ a mohkhâhpa ta, alyna daihti phapa vaw tlô awpa châta achhuahnoh awpa ta bietluna tao haw ei ta. (Bo 2-na pazao heihpa a châ aw)...