MARA NOVEL : PHURIE, BO 2-NA

Bo II-na

Khihrâ tlâhpi chô liata my noh vaw chhipa chata noh hrota a tao tyhpa pyly hawhta a ry lâta Khihhrâ khihpi cha za khai pathao ha heih ta; châhvâh my noh vaw chhipa cha Khihhrâ khihsawzy châta cha noh thiehpa nata noh phapa, rai tlyna daihti a vaw pahieh papuakheituhpa a châpa vâta mydi tawhta thathyu kawpa ta pyury hnei lei thei vei ei.Khihhrâ khihsawzy châta noh thiehpa a châna hawhta, nôhmei hârapazy nata sipasapazy châta chhao noh thiehpa, hnabeiseihna a chakaihpa ta avaw chhipa tah leitheipa châ tlai hra aw vei.

My hropa hawhta Awhchari liata awhzy papuapa ta, vao nodipa sâh ngâpazy liahsa a khâsia khai tawhtaNôdei chata sâh daih awpa a chhuahpa ta patohpatiah hai heih ta. O chhôh lâta chakoh kiah liata liahsa tyuhmo paryhpa ta ama paw, Mawkhu cha thaihrih uahpa ta atyuh thlâh ha hra ta. 

“Deidei, Dôthâ laiphô chôpa cha dia ma avaw di rai vei. Khataih râh ma a tlô sualuah haw vâ tly i?” tahpa ta ama nô sâh daih ngâpa cha kei moh ta. 

Ama nô Nôdei chata, “A!! pahno khao hra na. Atahmâ cha kaw satlia pathao ha ta, laiphô a chô pathaopa he a paphasa kaw hapana a châ ei aw. O a di leipa ta ma râh lâ a palâhpâ ha heih ma. Eima sawchapaw Dôthâ bao cha hnaihta a satlia tawhta chhao hârapa a châna he â pahno tu sisaw ha heih ta, khih chhôh lia viasazy a pakyh ta, lyurai hria hmeiseih awpa a y hlâ via, cha-yna daihti pakhôsa awpa hlâta cha râh lâta khihsa ta, râh a khie awpa khiahma â tlyh via ha heih?” tahpa ta a kaw heih hlei leipa ta sâh cha daih pazao lymâ ta.

Puhpa Mawkhu-zy nôvah he sawlei nawh-leipa ama châ hapa bao hnaihta, a hawti nota a nô nata paw ta ama thisai hapa, Dôthâ he saw hawhta mohôhpa ta, kyhtotie liata a pachhiepaphatuh chaipa châ ei ta; hârapa a châna hmahta â pahnotu ha la, tahpa ta kyhtotie liata ama papyupahly kaw hrapa a châ.

Puhpa Mawkhu he râh â khiena liata â piepasi tlamaw hapa vâta â khaihly khao leipa, a phei chachâh lâ chabiahpâpa châ ta. Lyurai chahrâhpa hmahta a hria thei khao leipa a châpa hnaihta, Dôthâ he amâ ngiapâ chaipa a châ. 

Dôthâ he Puhpa Mawkhu nawhtapa, Hniedô sawchapaw hnei chhôhpa châ ta; A nô nata paw heta Dôthâ he kô 10 rachhôh a châ nota amâ vaw pahâsai hapa a châ. Cha tawhna rakha chata Puhpa Mawkhu nah nôvah heta mohôhpa ta, saw lei nawh leipa ama châpa vâta ama sawchapaw hmeiseihpa hawhta mohôhpa ta, ama vaw deichhy lymâ hrapa a châ.

Châhrasala, Dôthâ heta hârapa a châna nata a nô nata paw hmeiseihpa ama châ leina he pahno ngâthlâh ha ta; nohkha noh liata ano liata kâchhiena nata akarina hnei leithei tyh leipa ta; nopi daihti âvaw lie na ta chhochhi cha a nô nata paw vâ pachaih tyh ta, O nata lyu liata pahrâ awpa hlâta râhhmâhpa lâ daihti a hmâh hluh via ha tyhpa a châ.

Dôthâ he nôpaw likah liata laiseihpa a châ taraw leipa ta a pawpaw Mawkhu nah nôvah ta ama deichhy pahnie kawpa vâta nata ama saw ta hawhta mohôhpa ta chhorei abyuhna liata chhorei ei, pachu abyuhna liata pachu ei, ama tahpa vâta satlia siapa, veiseihpa nata kyhtotie liata a viasanah ta amâ tlu leipa, ama palôhrupa ta ama mopasâh kawpa; anodeikua, hârapa a châna ama pahno thlâh hapa vâta amâ iekhy kawpa nata aru lâta ama tei paru kawpa a châ.

“Deidei, thophao tlô ti châ haw, khazia rimâ ma eima Dôthâ cha âvaw di to vei?” tahpa ta Puhpa Mawkhu cha  athaihrih uah ngâpa pasopanôpâpa ta ama nô laikah liata thopahreih pasopanô ngâpa cha kaw awsao ta.

Cha nona chata Dôthâ chhao cha kahmi vaw tlypâ ha hra ta. Pihnô Nôdei chata avaw hmô patawnah ta, “Pâpâ, nâ vaw di ha mâ. Na paw ta a cha pado ngâkaw la khâ” thlai vaw tah ta.

“Ei nâ, Atamy la pieva ei chôpa la ei za vaihpâ ha; hih vachari sâno avaw ao ta” tahpa ta a sahria cha za cha-ia ta, Pihnô Nôdei chata thlai vaw mohpa ta, “A lai kaw dia; na paw kha za pahmô tua. Ano kha kumaih leipa bao cha hnaihta, vachari cha rei lei, mamo dâhdei hmahta pa-ao mâh leipa châ ta khaw..kei he kheita ma zua eina pa-ao tly?”tahpa ta saisona chôta Dôthâ cha O chhôh lâ za pazipâ ha hra ta.

Puhpa Mawkhu cha a thairih uahpazy a pasopanô khai liahsa tawhta chakoh liana chata a tyuhpa ta, Dôthâ avaw hmô patawnah chata, “Pâpâ, khataih râh cha ma na tlô haw?tahpa ta na nô nahta eima vaw reih ngâkawpa tlai. Laiphô chôpazy cha pati niepâ h’awpa hnaihkawh ma châ vâ. Ama cha mohnao mâh tâ” tahpa sai vaw sopâ ta.

Dôthâ chata a reikah leipa ta pachôh liata barah cha kei lapa ta, a sahria liata vachari cha thaohpa ta barah liana chata za pachhi ta.

Vachari a hmô patawnah ta, “Aw, he dia laiphô chôna tawhta vachari nâ vaw dikhei thlâh haw. A lai dâh châ. A thawh kaw hih” tahpa ta vachari cha za paliepatheipâ lymâ ta.

Dôthâ chata, “Ei pâ, atamy la pieva ei chôpa la ei za vaihpâ ha. Sietlô daihti ta ei kaw tlô hmâ aw, tah ta taraw na ta eima pachih za chapiapâ ha na ta mâh my” tah ta.

Pihnô Nôdei chata, “Am’paw, nâ vachari kha tichhâ lâ kei buakhei la, kha he pati nie vaw tao para sala a pha khiah maw. Eima no chhao a di kaw bâ he” tahpa ta pati nie vaw taopa ta. Puhpa Mawkhu chhao chata vachari cha tichhâ ngaikheipa ta, buakheipâ lymâ haw hra ta.

Puhpa Mawkhu nata Pihnô Nôdei-na nôvah he uhthei lâchhâh ama châ hapa vâta Dôthâ he amâ pahniehna chaipa nata ama thlalôhna chaipa châ ta. Ama khihsatôhtuna â chhua-ua hra vei sala nôvah adyhryh kawpa nata aly thei kawpa ama châpa hleikhôta, Dôthâ he ama dao thai kaw hra.                                                                                                                                                           Pati ama nie ngâ nona chata Puhpa Mawkhu chata, “Pâpâ, atahmâla he satlia hmeiseihpa, nohkha noh liata chhôhkha pawhrâhpa duasu liata a kaw duah thei awpa zy châ ha bâ ei chi ta; hmo nama taona kyhtotie liata viasazy nata khihtlâh amopâpa nama châ awpa â ngiah ta. O lâ tlyma, râh lâ tlyma viasazy amopâ chaipa nata veiseih chaipa châ a chhuah awpa a châ” tah ta.

Pihnô Nôdei chata, “Pâpâ, zâhnia cha tho eima phaohna liata Ngôki nahta a nô za sie hra ei ta, na thâtih sai na hiahrih ta; thozy na haw khei ta. Nâmo pano he hawti no tawhta khâ âvaw pazipa châ ei chi ta. Bie nata thlih ama vaw tahpa hawh tlaita, thohawna nata tikhaoh bielôhawhpazy lia taihta nâmo pano thâtih he ama rei chaipa châ ta” tahpa ta Dôthâ cha vaw moh ta. 

Dôthâ chata, “Ei nâ, Ngôki cha phoso zuah, nôpaw a pie theipa O chhôh tawhta laiseihpa, syngôh zuah châ ta; kei dawh-ei satlia lia hmahta hâra thorapa na heta a phuh va na. Hawti no tawhta avaw pakyh tyhpa châ pi ta; atahmâla chyhsa mozy hmah ei ka tlamaw aw, tahpa he ei chi tyhpa vâta âhniahni awpa chhao he hmahta ei kâ a za chhie ha bâ” tah ta.

“Pâpâ, nâ bao heih hra he, na hârana he pahno tu saw ha heih chi ta pha vei la y. Keimo y pi ta, hâra thorapa a tah khao la chi. Na paw nata keima eima mo eima padei chhôh heta la hâra a tah khao kha y. Heihzy hawhta sôhthih eima hnei taraw leipa ta nâma pakha ta he la eimâ châ vao pahnie aw. Hâra thora a tah khao rai la chi. Chapawsaw châ chi ta, kyh totie liata satlia tiamapa nata chaolie a huapa na châna he my kha y…” tahpa ta Pihnô Nôdei chata a pati niena pasopanôpâna chôta Dôthâ cha palie ta.

Puhpa Mawkhu chata ama nô biereipa cha thlai vaw pazaopa ta, “Na nô reipa cha â do mâh my Pâpâ. Na nô nata paw, cha satuhpa la châ taraw ma pi, anodeikuala hâra thorapa hawhta nâ pachâ pathlei aw, tahpa chipa ta eima theina zydua ta cha chakuchavei pi ta; eima khihsatôhtuna he he hawhta tlâ châ hrasala, eima pano ta eima mo eima padei chhôhta la hâra a tah khao kha y. Na nô nata paw eima y hlâh hih” vaw tah hra ta.  

Pihnô Nôdei chata, “Zâhnia tho eima phaona liata Ngôki ta na thâtih sai reih ta; sia a cha tahna zie zy nata hawti no tawhta â khy chaipa na châna zie zy athata na chho ta. Anohao la eima khih laihsa lia ei mothai kaw. Phosopa zuah hmah châ hrasala, areisi ta, a nôchâ a ngia ta, nôpaw hneina apalaikheina palôh rai phaoh vei. Phoso zuah hropa rai lyu vei. Eima myuhnô châta ei uahva kaw” a kaw tah ngâ nona chata Dôthâ chata, “Ei nâ hra he, Ngôkiiah ta a cha zai hapa a châ hih. Kheita rimâ ma phoso zuah cha keimo machhiepa thota hârapa o chhôh lia beihphiah chhophiah tao sala na tah rai” thlai vaw tah ta. Ngôki thâtih chata ama O chhôh cha palôhpahawh lymâ ha heih ta.

(Bo 3-na thlai eima vaw pazao heih aw...)