Article : CHASIPAW CHAKUA CHAIPA

Kô hropa zydua hlâta cha kô cha chakua pachaih ta, râhsa nano nanopazy cha ziza chakua tu hapa vâna chata ama nôpo ngaita kaw sai.

Sawku sahlao tlai heta cha hawhta ziza chakuapa tawhta abohna dâh awpa cha vaw pachâ ngâkaw ei ta; sahlao ta ykhoh ta apalalôhsa n’awpa dâh tluapa ta hmahla haw ei ta. 

He he ziza chakuapa tawhta amâ boh thei n’awpa dâh a châ tahpa pahno ei ta; châhrasala ama hlohzy chata ama viasanah chhô chhyh ha ta, hmah amâ paphaosa chhyh ha.

Buakha chhôh tlai cha hawhta ama ykhoh sahlao tawhta, cha hawhta hmah amâ paphao ngâpa vâna chata â hneisai heih ei ta, cha hawhta amâ pahla patawnah chata thokha cha a chakuapa chata kohsao pathao ha heih ta. Cha hawhta ama hryta thokha ama kohsao pathao haipa vâna chata he hawhna heta ryhraona tao ha heih ei ta : 

ama viasanah hloh ta a chhô ngâpa taopa cha ma ama khoh via ma; a chakuapa vâta thi awpa cha maw?

tahpa ta khotlyna tao haw ei ta. 

Ama hloh ta a chhô ngâkawpa chhao ta amâ boh thei n’awpa ta â hnia kawpa ta ykhoh heih awpa chata bietluna tao haw ei ta.

Ama hrona pabohsapa ta amâ palalôh thei n’awpa ta ama hloh ta a chhô ngâpa chhao cha pahnolei a pachâpa ta â hniehpakhy ha heih ei ta. Cha hawhna chata chasipaw chakua kawpa cha ama khô pathlah thei hapa a châ.

Marasawzy chhao pi, Chipho hawhta eimâ duahpapua theina awpa kyh liana heta, disaona ziza chakuapa ta miah a kohsao leina awpa ta cha, hmaohkha ta ykhoh ta, a palalôh awpa ta eimâ hniehpakhy awpa â ngiah ta; cha hawhta châ leipa ta, ano-eih sai ta eima y khiahta cha, disaona ziza chakuapa ta thlai, pakha lymâ ta miah a kohsao lymâ tlai aw..

Disaona ziza chakuapa tawhta apalalôhpa ta, eimâ boh theina awpa ta, eima hlohzy ta eimâ vaw chhô tlamaw ngâpa chhao ta, khâchâ ahniehpakhypa ta, eimâ bohna awpa ta a palalôh lymâ Suh vy...

Rohtuhpa : Robert B.Syuhlô, Siaha