Article : MEDIA - Na kupi ta khizaw a panano thei

Brack Obama lahpinô, Michelle Obama biereipa miakha rônah kawpa, â do kawpa ta ei pahnopa cha, "Hlaotlohna cha sôhthih khazie ta hluhpa ma na lapangia tahpa he châ vei - Mohropa hro liata Khatluta ma a phana lâta hmo na patlôsa tahpa liata tlao thlie ma y" tahpa ta a reipa kha a châ. 

Chata tly, eima pahrâna khizaw liata cha, chyhsa nano nanopazy ta - ama heih chyhsazy ama panuana nata, ama thliena a nano chyu ta, â lyucho tlâ hra vei. Hla miakha liata cha,

"Hneirôna nata rônahnazy chhao he;

Athlietuhpa liata â pahnieh"

a vaw tahpa hawhta; chyhsapa ta a chyhsa heihpa a khopathliahna dâh he â lyucho tlâ thlyu aw vei.

_Democracy_ râh liata cha, _Zawpi sawhkhâ, zawpi ta ama Paduapa, zawpi ta âmo châta ama Paduapa_ sawhkhâ ta ryureina nata, râh hmahsiena a pha kawpa ta a siekhei theina awpa liata â duana awpa, â icha kawpa ta â dua theina awpa ta Otôh 4 â ngiah. Chanahzy cha -

*1. Legislature* : Râh amohôhna dâh awpa kyh liata dâh nata phôh taotuhpazy he ama châ. Chanahzy cha zawpi ta eimâ tlyhpatlohpa MDC, MLA, MP zy he ama châ.

*2. Executive* : Henahzy maophaohna cha dâh nata phôh chalo chaba (Enforce) ta, ama ryureina ta â ôna chhôh liata dâh nata phôh a phapa ta siekheipa he a châ.

*3. Judiciary* : Dâh nata phôh taopazy pabohsa ta, zawpi ryureina râh liata Dâh ta bie a hnei tlai na/dâh â bei chai tlai na tahpa pasia awpa he a châ.

*4. Media* : Democracy râh lâsie paryhna dâh pakhâta ta mohpasia ta, a siechheina nata â doleina pakhâta ta mohpasia ta, taopathituhpa raihriapa he MEDIA tao awpa nata hria awpa a châ eima tah thei. Democracy râh liata Media peimawhzie he eima pahno chyu aw. Media chyhsa eima tahpazy cha - Sawhkhâ lâsie paryhna dâh phuahzâhtuhpa, chyhsa pachâna khotalai kawpa ta phuahtuhpa nata, Thâtih thiehpa phuahzâhtuhpa, Thâtihbu papuatuhpa, TV, Internet-zy hmâhpa ta, hmo a tlôna dâh nata, a tlôkheina dâh â do kawpa ta phuahzâtuhpazy he ama châ eima tah thei aw.

A chô liata Democracy a pahniehna lôbôpa miah palihpazy khi ama peimawh khai nota, MEDIA peimawhna eima pahno leipa vâta a chô liata otôh mia 3-pa - Legislature, Executive nata Judiciary zy khita lâchavei ama tly ha tyh.

Media-zy ta ama tao awpa dopa - Hmodopa palâhâhpa nata, Biedopa a châhkhei ta, hmo a liahthaipa (Neutral) tawhta palâhâh ta, sawhkhâ lâsie pado amâ chhuah khâchâ ha khiahta cha, Democracy chhao ta lâdo a tlyh para ha tyh.

Atahmâhlâ khizaw nata, râh nano nanopazy saipa ta chhao - Media ta sawhkhâ adoleina nata, siechheina phuahzâh ngâh leipa ta, sawhkhâ panaopapana chôta a siepa maih râh cha - Democracy râh a châpa chhao ta, zawpi pachâdâh khotalai kawpa ta ama phuah ngâh leina, MEDIA tlybaipa ta ama yna râh a châ cheingei aw.

Media khotalaina râh, Democracy râh liata cha zawpi riahpha ei ta, sawhkhâ pha leipa ta daihti rei hnei tyh vei.

US nata Vietnam adyuhna rarô-ypa chalihsatuhpa cha, _MEDIA_ hmotaotheina vâta a châ ama tah tyh. Kô 1972, Chhiepa noh 8 liata Vietnam chanô hawtipa, thluahruapa ta chana chôta lâthlôh liata a sie ngâpa nohthlahpa, Associated Press liata a hriapa, *Nick Ut* ta a lapa *“The Terror of War”*, *“Napalm Girl”* tahpa ta reipa nohthlahpa, thâtihbu liata ama papuapa khata, Vietnam adyuhna rarô-yzie palâsapa ta, US sawhkhâ palôh taihta â nanopa kha a châ.

Atahmâ cha chyhsa to he MEDIA chyhsa eima châ ha bâ..!

Zâchareih, mychareihta na thâtih thiehpa lana hnawh nata, bie nata hla, Video nata ropa ta na dao hluh chaina su cha, 'MEDIA' hryta hawti chaipa, 'SOCIAL MEDIA' - _Facebook, Whatsapp, YouTube etc-_ a châ ha bâ. He hawhpa a hriapa zydua cha Thâtihthiehpa papuatuhpa, hiezawhtuhpa nata, moh padotuhpa (Editor) eima châ khai ha bâ.

Chyhsa tozy cha chârohtuhpa nata, nohthlahlatuhpa lâta alie khai ha pi ta; Social media siepahliepa ta eima pachâdâh, Saina opy nata, palôh aheihna lâ maih eima hiezawh tyh.

He hawhta a châ nona heta, he 'SOCIAL MEDIA' heta, eima pachâ papha leipa lâ tawhta chyhsa hmo saizie, hmôna dâh nata, apyhnadâh a panano thei..tahpa he my kha y.

He Social media hmâpa heta Democracy râh ryureina liata ao nata reih papua thei chi ta, pachâdâh thiehpa nata, sawhkhâ ryureina a do leipa na seisia thei tahpa he my leipa la; he Social media he, Democracy thatlôna nata, O tôh a ichapa a châna kyh liata, a pa-ipacha viatuhpa na châ thei.

Social Media he, Râh ryureina chabatuhpazy châta zawpi ao nata reih ama thei theina su a châ ha bâ hapa hawhta, SOCIAL MEDIA he, zawpi ta Democracy ryureina liata zawpi vyuhpa ta atlyhpatlohpazy, lâdopa ama tly lymâ theina awpa pahmôtuhpa a châ ha hra.

Social Media siepahliepa ta, na kupi hmâpa ta na pachâ phuahluah la, Hmodopa nata, lâdopa a châpa ta na pahnopa, SOCIAL MEDIA tawhta phuahzâh lymâ la..atahmâhlâ khizaw liata zawpi ta ama nah ama pachôh chaina, 'SOCIAL MEDIA' hmâh phahnai ma y.

Michelle Obama reipa hawhta, Social Media hmâpa ta, na râh, Chipho liata a phana lâta a nanona na tlôkhei thei tahpa my kha y..

Rohtuhpa : Robert B.Syuhlô, Siaha